Алатай киш юкъуз Махачкъалада кьиле фейи хуьруьн майишатдин мекерадиз (ярмарка) Дагъустандин Кьилин везифаяр вахтуналди тамамарзавай Владимир Васильев мугьман хьана.
Мекерада майдандиз акъуднавай суьрсетдихъ галаз гьакIни Дагъустандин парламентдин кьил Хизри Шихсаидов, Дагъустандин Гьукуматдин Председателдин везифаяр вахтуналди тамамарзавай Абдусамад Гьамидов, РД-дин Кьилин ва Гьукуматдин Администрациядин руководитель Владимир Иванов, хуьруьн майишатдин министрдин везифаяр вахтуналди тамамарзавай Керимхан Абасов, Махачкъаладин мэр Муса Мусаев ва министррин кабинетдин маса членарни таниш хьана.
Республикадин хуьруьн майишатдин карханайри — ГУП-ри, лежбервилинни фермервилин майишатри — иниз емишар, майваяр, як, вирт, ширинлухар ва са жерге маса продуктар гъанвай.
Владимир Васильева, мекерадин жергейра къекъвез-къекъвез, хуьруьн майишатдин суьрсет гьасилзавайбурухъ ва меркездин агьалийрихъ галаз суьгьбетарна. Мярекатдиз талукь баянар гудайла, кьилди къачуртIа, ада малумарна: “Фикирда гьатай шикилар лап хъсанбур я. Иниз инсанри чпин рикI эцигна гьасилнавай шейэр гъанвайди аквазва. Вирида дад акун теклифзава ва шегьерэгьлияр мекерадиз датIана къвезва. Бязибур аялар, бязибур хтулар галаз. Им рикIиз хуш жедай кIвалах я. Санлай къачурла, алай йис хуьруьн майишатдин суьрсет гьасилзавайбур патал къулайди хьуни чун шадарзава. Чна инлай кьулухъни санал кIвалахда ва абуруз куьмекар гуда. Хуьруьнвийрив абуруз гузвай куьмек агакьун лазим я.
И жигьетдай уьлкведин Президент Владимир Путинан ва Гьукуматдин Председатель Дмитрий Медведеван фикир сад я — хуьруьз куьмек гун. Чаз им суьрсетдин рекьяй чи хатасузвал, чи гележег тирди лап хъсандиз чизва. Къе инал къейд авурвал, чавай гила Туьркиядин помидорар ва Польшадин ичер галачизни кьил хуьз жезва. Алава яз, чи суьрсет экологиядин жигьетдайни михьиди я. Къе чаз, властдин векилриз, суьрсет гьасилзавай ксариз чна чпин патахъай къайгъударвал ийизвайди акуна, гьакIни абурун ван чав агакьна кIанзава”.
РД-дин Кьилин ва Гьукуматдин Администрациядин пресс-къуллугъ
