И йикъара Мегьарамдхуьруьн районда Советрин Союздин Игит Абас Исрафилован тIварцIихъ галай 1-нумрадин ДЮСШ-да 2004-2006-йисара дидедиз хьайи жаван спортсменрин арада дзюдодай райондин кIвенкIвечивал патал акъажунар кьиле фена. Идакай «Лезги газетдиз» райадминистрациядин пресс-къуллугъди хабар гана.
Дзюдо районда машгьур авунин ва спортдин и жуьредай республикадин дережадин акъажунра иштиракдай викIегь спортсменар хкягъунин макьсаддалди кьиле тухвай турнирда 80 жегьилди (заланвилин 9 дережада) чпин алакьунар къалурна.
Акъажунрин нетижада заланвилин вири дережайра агалкьунар хьайи дзюдоистар тайин хьана. Гъалиб хьайибурузни хъсан чкаяр кьурбуруз талукь дипломар гана.
Къейд ийин, спортдин и мярекат райондин образованидин управлениди физкультурадинни спортдин отделдихъ галаз санал тешкилна.
«Лезги газет»
