И мукьвара Мегьарамдхуьре гьар йисуз тешкилзавай лезги­ музыкадинни манидин «Самурдин зул» фестиваль кьиле фена. Культурадин кIвалин вилик­ аялрин искусстводин школади­ ва абурун яратмишунрин цент­ради зулуз талукьарнавай выс­тавкаяр ачухнавай. КIватI хьан­вайбуру анин экспонатрал разивилелди гьейранвалзавай.

Фестивалдин тамада Виолета Рамазановади «Самурдин зул» фес­тиваль ачухун малумарна. Сегьнедиз сад-садан гуьгъуьналлаз райондин халкьдин алатрин «Устад» ансамбль, манидарар тир Седа­къет Саидова, Назиля Саидалиева, Давуд Абдулмежидов, Касмудин Меликов, Билал Эскендеров, Вадим Айсаев, Малик Саидалиев, Сергокъала, Кьурагь, Хив районрин халкьдин манияр лугьудайбур хкаж хьана.

Мярекатда РД-дин Гьукуматдин «Дагъустандин руьгь» премиядин сагьиб Шагьбуба Къазиев кьиле авай халкьдин «Гьунар» тIвар алай пагьливанрин дестеди къалурай вири нумраяр ва зуьрнечийрин шад авазар кIватI хьанвайбуру гурлу капар ягъуналди къаршиламишна.

Сифте гаф мярекатдал райондин кьил Фарид Агъмедоваз гана. Ада «Самурдин зул» фестивалдин ва «Ислягьвилин ашукьар» суварин иштиракчийриз, кIватI хьанвай жемятдиз культурадинни искусстводин кьве мярекатни мубаракна. Ада музыкадин культуради чи уьмуьрдин вири хилериз хъсандиз таъсирзавайди, арада авай къуншивилин алакъаяр мягькемарзавайди, халкьдин культурадин ирс хуьниз куьмекзавайди къейдна.

«Самурдин зул» фестивалдин гуьгъуьналлаз и юкъуз Мегьарамдхуьре «Ислягьвилин ашукьар» лишандик кваз чIехи суварни кьиле фена. Дагъустандин халкьарин культура хуьнихъ элкъуьрнавай и серенжем РФ-дин Президентдин Грантдин ва Россиядин хизандин йисан сергьятра аваз кьиле тухвана. Ам «Ватанпересвилин манияр ва музыкадин эсерар арадал гъун — им ашукьрин искусство хуьнин важиблувилин паярикай сад я» элкъвей столдилай гатIунна.

«Чи мярекат Дагъустандин рай­­он­­р­а авай ашукьрин алай аямдин яратмишунриз бахшнава. Къе чаз инал ашукьрин яратмишунрин важиб­лувал къейд ийиз кIанзава. Алай вахтунда ашукьри халкьдин музыкадин адетар­ давамарзава,­ несилрилай­ атанвай­ культура хуьзва. Ашукьрин гьам чIе­хи­­­бурун ва гьам аялрин ансамб­лар виликди физва. Алай аямдин­ ашукьрин­ репертуарда ватанпе­рес­ви­ликай, дуст­виликай, жуьр­эт­лу­вил­и­кай манияр­ ава. Им и проект­дин кьилин макьсад я», — къейдна­ вичин рахунра Гь. ЦIа­да­­садин тIварцIихъ га­лай­ чIалан, литературадин ва искус­стводин институтдин искусстводин та­рихдин отделдин заведующий, ис­кус­ст­вове­де­ни­дин­ кандидат Эльмира Абдуллаевади.

Элкъвей столдин кIвалахда­ гьакI­ни РД-дин композиторрин со­юз­дин пред­се­датель Ф. Рама­за­но­ва, РД-дин музыкантрин союздин председа­тель, профессор, РД-дин халкьдин ар­тист, РФ-дин искусствойрин лайих­лу деятель Хан Баширова, журналист, композитор, критик Мурад Саи­дова, Мегьарамдхуьруьн райондин культурадин отделдин директор Эседуллагь Селимова, музыковед Эдуард Ашурагъаева, Бут-Къазмайрин ва Советский хуьрерин культурадин центрайрин заведующияр тир Айдун Мегьамедова ва Эсфира Хасплатовади, журналистри ва масабуру иштиракна.

Анал «Аяларни жегьилар дуьньядиз килигзавай тегьер дуьзмишун патал ватанпересвилин манияр арадал гъун»; «Алатай ва алай аямдин музыкадин искусство»; «Аваздалди шиирар кIелдай ашукь­рин искусство» ва маса темайрай месэлаяр веревирдна.

Шаирар тир Етим Эмина, Кьуьчхуьр Саида, СтIал Сулеймана, ашукьар тир Несредина, Ширина, Саки­та… тунвай багьа ирс давамариз­, ашукь­рин лугьунинни музыкадин­ алат ягъунин надир искусство яша­миш­ жезвайди ва виликди физвайди къейдна абуру.

РД-дин «Дагъустандин руьгь» госпре­миядин лауреат, РД-дин культурадин ла­йихлу работник Ай­дун Ме­гьамедова ва Советский хуьруьн клубдин худрук Эсфира Хасплато­вади ашукьвилин искусстводай ма­с­тер-клас­сар тухвана, гьакIни шииратдинни аваз­дин са чIукни къалурна.

Къейд ийин хьи, Айдун Мегьа­ме­дова Мегьарамдхуьре аялрин ашукьрин «Чубарук» ансамблни тешкилнава. Ам 10-14 йисара авай кьуд аялдикай ибарат я. Абуру рикI алаз чуьнгуьр ягъиз ва манияр лугьуз чирзава. Мярекатдал «Чубарук» ансамбл­дини алакьунар къалурна.

«Ислягьвилин ашукьар» сувар Ахцегь, Докъузпара, СтIал Сулейманан, Рутул, Мегьарамдхуьруьн, Дербент районрин ва Дербент шегьердин ашукьри чIехи концерт гуналди акьалтIна.

Халкьдин адетдин художест­вен­ный ярат­мишунар хуьнай ва ви­лик тухунай Айдун Мегьамедов райондин чIехи шабагьдиз — «Мегьарамдхуьруьн райондин гьуьрметлу агьали» лишандиз — лайихлу хьана.

Мярекатрин вири иштиракчийриз РД-дин культурадин министерстводин дипломар ва Мегьарамдхуьруьн райондин администрациядин патай рикIел аламукьдай савкьатар гана.

Виниз тир дережада аваз кьиле фейи мярекатрин тешкилатчияр РД-дин культурадин министерство, Рес­публикадин халкьдин яратмишунрин кIвал, Мегьарамдхуьруьн райондин администрация ва культурадин отдел тир.

Къагьриман  Ибрагьимов