«Къенин девирда чкадал кIвалах амач, гьавиляй чи хуьрерай гзаф жегьилар патарални физва», — икI лугьузвайбурухъ галаз Эминхуьряй тир тежрибалу багъманчи, арендатор Тажир Батманов эсиллагь рази туш.

— Зунни зи хизан гьар юкъуз жуван кIвалерихъ галай салан участокда­ ва арендадиз къачунвай багъда кIва­лахдик ква, — лугьузва ада. — Эхиримжи йисара районда инвестицийрин проектрай виш гектарралди майданра ичин, чуьхверрин, шуьмягърин ва маса емишрин багълар, уьзуьмлухар кутунва, суьрсет гьасилзава. Бес ибур кIвалахдин чкаяр тушни?!

Арендатор-багъманчи гьахълу я. Советрин девирда «Аламишинский» совхозда шофервиле кIвалахай Тажир Батмановакай, совхозар чкIайла, арендатор хьана. Сифтедай ам вичин салан участокдихъ гелкъвезвай.

Зегьметдал рикI алай, чилин къадир авай Т. Батманова 2008-йисуз 8 гектар чил яргъал муддатда арендадиз къачуна, ана ичин багъ кутуна.

— За жуван участокда чкадин шар­тIара хъсан бегьер гудай «айдаред», «семеренко», «зимний шафран», «голден», «мутсу» сортарин ичерин къеле­мар цана, — лугьузва ада. — Гьар йисуз багъларай ичерин бул бегьер кIватI хъийизва. Муьштерийрин патахъайни кьитвал авач.

Т. Батманова вичин багъдин къерехар тирвал шуьмягърин къелемар цанва, гьакIни арендадин участокда хизандин игьтияжар патал гъвечIи майданра салан майваяр гьасилзава. Ида хизандин игьтияжарни таъминарзава, алава къазанжини гъизва.

— Районда хуьруьн майишатдин­ хиле 960 кас арендаторри кIвалах­­за­ва, абурун арада Тажир Абдурагьмано­вич вилик жергейра авайбурукай сад я, — лугьузва райондин хуьруьн майиша­т­дин ва суьрсетдин управлени­дин кьилин пешекар Гьамидин Абдулкъафарова. — Дурумлу зегьметдай чна адаз баркалла лугьузва.

Хазран  Кьасумов