Мегьарамдхуьруьн райондин пресс-къуллугъди хабар гузвайвал, алатай гьафтеда райондин кьил Фарид Агьмедова муниципалитетдик акатзавай хуьрерин командайрин арада футболдай кьиле тухвай чемпионатда гъалиб хьайи ксарив шабагьар вахкана. ЦIи спортдин и серенжем ЧIе­хи Гъалибвилин — 76 йис ва ДАССР-дин­ 100 йис тамам хьуниз бахшнавай. Къу­гъу­нар июлдиз башламишнай. Алатнавай тамам кьве вацра (июль ва август) коман­дай­ри чпин устадвал ва алакьунар къалурна, футболдал рикI алайбуруз яргъалди рикIел аламукьдай декьикьаяр багъишна. Чемпионатда 9 командади иштиракна. Абуру вири санлай 46 къугъун кьиле тухвана.

Райондин кьилин тапшуругъдалди и чемпионат тешкилайди райадминистрациядин физический культурадин ва спортдин отдел тир. Къизгъиндаказ кьиле фейи къу­г­ъунрин нетижада райондин командайрин арада чемпионвилин тIварцIиз Ярагъ-Къазмайрин хуьруьн команда лайихлу хьа­на. 2 ва 3-чкаяр, талукь тирвал, Къуй­сунрин­ ва Кучун-Къазмайрин командайри кьуна.

Гъалиб хьайибурув шабагьар вахкудай мярекатдал Ф.Агьмедова чемпионатда иш­­­тиракай командайрихъ гележегда еке агалкьунар хьана кIанивилин ва гележегдани азад вахт спортдал машгъул хьуниз бахш авунин келимаяр лагьана. Гъалибчи командайрив дипломар, медалар ва пулдин пишкешар вахкана.

Чи мухбир