Эферар 70-80 сантиметр кьван виниз хкаж жезвай, гуьтIуь пешер экъечIдай набатат ва адан тум я. Наба-татдал гъвечIи четиррин кIалубда авай лацу цуьквер экъечIда. Адет яз, ам июндиз цуькведа жеда. Абур дагъдин чIурара, тамун къерехра, чи бязи чуьллерани булдалди экъечIзава.
Эферар тIям хъсанарун патал хуьрекрик кутазва. Абурухъ иштягь хъсанардай къуват ава. Дагъвийри асул гьисабдай абур регъвена ишлемишзава. Амма абурук дармандин такьатарни ква. Бязи азарриз акси яз менфят къачун патал набататдин тум (эферар) кIватIзава. Эферар алай “четирар” атIана, кьурурзава ва абур гьава фин тийидай къапуна хуьн меслят къалурзава.
Эферрик эфирдин гъери, углеводар, белок, флаваноидар, шкьакь ква. Медицинада эферар квай антисептикаярни малум я. Халкьдин медицинада абурукай хуквадин кIвалах хъсанарунин, бронхитдиз акси дарманрин еринда хийир къачузва. Бронхитдиз, жигеррин азарриз акси яз эферар ргай яд ишлемишзава. Метеоризмдиз (ратара газ кIватI хьун) акси яз лап гъвечIи аялризни гуз жеда. РикIин, дуркIунрин азарар авайбурузни эферрикай менфят хкатда.
Эферрин чIемедикай авай еке хийирни инсанриз фадлай малум я. Абурукай гьалима гьазурдай, ишлемишдай къайдаяр ва макьсадар пешекарривай хабар кьун чарасуз я.
«Лезги газет»
