И йикъара Мегьарамдхуьруьн район арадал атуниз талукьарна, анин кьил Фарид Агьмедова тестикьарнавай пландин бинедаллаз кьилиз акъудзавай мярекатрин сергьятра аваз, Кучун-Къазмайрин спортдин комплексда волейболдай итимрин арада ачух турнир кьиле тухвана. Адан макьсад районда волейбол машгьур авун, жегьилрин устадвал хкажун, чпихъ алакьунар авай спортсменар майдандиз акъудун тир.
Райондин администрациядин физический культурадин ва спортдин отделди тешкилнавай и турнирда Мегьарамдхуьруьн, Ахцегь, Кьурагь ва СтIал Сулейманан районрин командайри иштиракна. Турнирдин сергьятра аваз иштиракчи командайрин арада 6 къугъун кьиле фена. Абурун нетижада Кьурагь райондин команда 1-чкадиз лайихлу хьана. Ахцегь ва СтIал Сулейманан районрин волейболистри, талукь тирвал, 2 ва 3-чкаяр кьуна.
Гъалиб хьайи ва приздин чкаяр кьур командайриз дипломар, медалар ва пулдин пишкешар гана.
* * *
Мегьарамдхуьруьн районда спортдиз артух фикир гузвайди къейд авунихъ галаз сад хьиз, чаз ана и мукьвара кьиле фейи мярекатрикайни куьрелди хабар гуз кIанзава.
ИкI, 21-сентябрдиз Чепелрин хуьре, ДАССР-дин 100 йисан юбилейдиз бахшна, мини-футболдин майдан ачухна. Спортдин цIийи объект “Хуьрерин мулкар вири патарихъай вилик тухун” госпрограмма кьилиз акъудунин сергьятра аваз эцигна. Ам ачухуниз талукьарнавай шад мярекатда райондин кьил Ф.Агьмедова, РД-дин хуьруьн майишатдин ва суьрсетдин министрдин заместитель Зураб Куччаева, “Дагсельхозстрой” ГКУ-дин директор Мегьамед Юсупова, “Сад” КФХ-дин инвестицийрин проектдин регьбер Керимхан Абасова, чпин гъилик чирвилер къачузвай аяларни галаз муаллимри ва маса ксари иштиракна. Мярекатдал райондин кьили стадион эцигайбурун тIварцIихъ кIвалах ерилудаказ кьилиз акъудунай хуш келимаяр лагьана. Ам хуьруьн агьалийрин рикI аладардай, сагъламвал мягькемардай, гьакIни жуьреба-жуьре мярекатар кьиле тухудай чкадиз элкъведайди къейдна.
РикIел хкин: ихьтин стадионар Мегьарамдхуьре, Бут-Къазмайрал, Билбилхуьруьн-Къазмайрал, Хъартас-Къазмайрални ачухнава.
* * *
Са тIимил йикъар идалай вилик Мегьарамдхуьре, Абас Исрафилован тIварунихъ галай 1-нумрадин ДЮСШ-да, грэпплингдай райондин ачух турнир кьиле фена. Ана райондин хуьрерай ва Дербент шегьердай тир 50-далай виниз спортсменри иштиракна. ДАССР-дин 100 йис тамам хьуниз бахшнавай и акъажунар тешкилнавайди райондин физический культурадин ва спортдин отдел тир. Гъалибвилин ва приздин чIехи пай чкаяр Мегьарамдхуьруьн райондин спортсменри кьуни ана спорт йигин еришралди вилик физвайди субутзава.
«Лезги газет»
