Чи ватанэгьлияр — гьар сана

Жуьреба-жуьре пешеяр хкянавай хейлин къурушвийри алай вахтунда Россиядин гьар жуьре пипIе­ра тарифлудаказ зегьмет чIугваз­ва. Абуру чIе­хи бубайри чпиз тур ве­сиярни насигьатар чIурзавач, абур намуслувилелди кьиле тухузва, абурал амал ийизва. Инсанвилин хъсан къилихарни ерияр хас тирвиляй абурал жавабдар пешеяр тапшурмишзава.

Тек са Къурушдал ваъ, вичин вахтунда вири Дагъустандани кваз тIвар-ван акъатай математикадин муаллим, рагьметлу Вагьидов Эюб Мегьамедовичан хизандай, адан несилдай саки 30 муаллим акъатнава. Амма эхиримжи йисара адан хтулрини птулри маса  пешеяр хкязава, яни вахтунихъ галаз сад хьиз къадамар къачузва. Алай вахтунда адан кьве хтулди — Вагьидов Эюбани Фариза — пассажирар тухудай, йигиндаказ фидай “Ласточка” электропоездрин машинистар яз кIвалахзава. Къе заз 2-классдин дережадин машинист  Вагьидов  Фа­риз  Мегьамедовичакай  суьгьбет ийиз кIанзава.

Фариз  1992-йисан  2-сентябрдиз Хасавюрт райондин Къурушрин хуьре муаллимрин хизанда дуьнья­дал атана. Хуьруьн 1-нумрадин юкьван мектеб тарифлудаказ куьтягьай ам, вичин чIехи стха Эюбни галаз Дербент шегьерда авай 1-нумрадин ракьун рекьин  пешекарар гьазурдай училищедиз гьахьна. А йисара а училищедиз, директор яз, абурун ими, Дагъустандин лайихлу муаллим Вагьидов Мустафа Эюбовича регьбервал гузвай. Ана чпиз пеше къачур кьве стхани Краснодардин крайда авай ТЧ-16-нумрадин депода машинистдин куьмекчияр яз кIвала­хал кьабулна. Вичин пешекарвилин чирвилер артухарун патал Фариз Ростов ше­гьер­да авай ракьун рекьерин университетдик экечIна, агалкьунралди куьтягьни авуна. Адаз Сочи ше­гьер­да авай йигиндиз фидай поезд­рин дирекциядиз теклиф хъувуна, къенин йикъалди чи ватанэгьлиди ана 2-классдин дере­жа авай машинист яз зегьмет чIуг­вазва. Адалай гуьгъуьниз Фари­за Санкт-Петербургда ракьун ре­кье­рин дирекциядин учебный цент­рада мадни вичин чирвилер хкажна.

ЧIехи стха Эюбани гьа рехъ да­вамарзава. Фариз Мегьамедович вичин пешекарвилин везифаяр намуслудаказ кьиле тухунай хурудал алкIурдай “Лучший по профессии” знакдин (2019-йис), цIудралди дипломринни грамотайрин ва маса къиметлу пишкешрин сагьиб я.  Адан шикил Сочида авай ракьун ре­кьерин дирекциядин гьуьрметдин доскада ава. Фаризан зегьметдин рехъ са акьван яргъиди туштIа­ни (10 йис), ада вичиз дирекциядин, юлдашрин ва пассажиррин патай баркаллани гьуьрмет къазанмишнава.

Алай вахтунда Фариз Мегьамедовича вичин уьмуьрдин юлдаш Светланадихъ галаз хва Адам тербияламишзава, Туапсе шегьерда яша­миш жезва. Халкьдин тIвар виниз акъудзавай рухвайриз баркалла,  аферин!

Гьажи  Къазиев