Махачкъалада “Жанлу классика. Дагъустандин композиторрин музыкади ван ийизва” лишандик кваз республикадин музыкадин сад лагьай фестиваль кьиле фена.
Адан тешкилатчияр РД-дин культурадин министерство, операдинни балетдин театр, Россиядин композиторрин Союздин Дагъустанда авай отделение тир. Мярекат кьиле фейи 10-ноябрдилай 7-декабрдалди тамашачияр Дагъустандин музыкадин ирсиниз мукьва, чи композиторрин гзаф жанрайрин яратмишунрихъ галаз таниш хьана. Фестивалдин сергьятра аваз операдин, балет патал манийри, камерный музыкадин, вокалдинни алатрин ва хордин эсерри, фортепиано патал яратмишунри ван авуна. Адан тешкилатчийрин, музыковедрин, искусствоведрин иштираквал аваз Дагъустандин манийрин искусство вилик тухуниз талукьарнавай элкъвей столни кьиле фена. Пешекарри Дагъустандин алай аямдин пешекар музыка авай гьалдикай, ам мадни еримлу авун патал къачуна кIанзавай камарикай, бажарагълу жегьилар желбуникай веревирдер авуна.
Фестивалдин эхирдай Къумукьрин муздрамтеатрда гала-концерт кьиле фена. Ина РД-дин культурадин министрдин везифаяр вахтуналди тамамарзавай Зарема Бутаевади ва масабуруни иштиракна.
Мярекатдин сергьятра аваз дагъустанви гзаф композиторар грамотайринни дипломрин сагьибар хьана, кьилин шабагь “Намус ва лайихвал патал — “КукIуш” кубок тир. Адан сагьибар СССР-дин халкьдин артист Мурад Кажлаев ва госпремийрин лауреат, Россиядин искусствойрин лайихлу деятель Мегьамед Гьуьсейнов хьана.
М.Гьуьсейнов гьар жуьре жанрайрин кьве вишелай гзаф эсеррин автор я. Абурун арада “Шарвили” опера, драмадин “Эмин” поэма, “Дагъустандин музыкадин рангар” симфониядин сюита, оркестр галай тар патал “Лезги рапсодия”, “Намусдин наразивал” трагедиядин фрескаяр, рутулрин лирикадин “Лалаандин везинар” Кантата, вокалдинни симфониядин, камерный эсерар, тамашаяр, телефильмаяр патал манияр ва гзаф масабур ава.
Дагъви Шериф
