Эльза  Ибрагьимова. Халикьди надир бажарагъ гайи и дагъви дишегьлидин руьгьдин дегьнейра арадал атай музыкадин авазар яб акалзавай гьар сада гьевеслу илгьамдин булах хьиз кьабулзава. Адан гьар са композицияда экуь шадвал ва рикI чуькьведай пашманвал, чи ди­шегьлийрин гамарин нехишар, муь­гьуьб­батдинни яшайишдин сирлу къуватар хьиз, гьатнава.

Эльза Ибрагьимова 1938-йисан 10-январдиз Азербайжандин Ажи­къабул шегьерда ракьун рекьерин устIарар Имамединанни Сунадин хизанда дидедиз хьана. Аял чIава­лай рушан рикI халкьдин авазрал, мугъамрал гзаф алай. Гьаниз килигна диде-бубади чпин руш 8-нумрадин музыкадин мектебдиз тайинарна. Анаг акьалтIарайдалай кьулухъ Ибрагьимовади Асаф Зейналлыдин тIварунихъ галай музыкадин училищеда чирвилер къачун давамарна. Училище агалкьунралди акьалтIа­рай руш 1958-йисуз Азербайжандин Уь.Гьажибегован тIварунихъ галай консерваториядин композиторрин факультетдиз гьахьна. Ина адан сифте муаллим бажарагълу композитор Джовдет Гьажиевакай хьана. Са йис арадай фейила Эльзади СССР-дин халкьдин артист Къара Къараевавай чирвилер къачуз га­тIун­на. Вичин уче­ницадихъ галаз ком­позитор­ви­лин къайдайрин винел кIвалах­дай­ла, бажарагълу муаллимди Эльзадиз халкьдин музыкадин бинейрив игьтиятлувилелди эгечIун меслят къа­лурна.

Гьеле студентка тир йисара Эльзади, гъвечIи эсеррихъ галаз сад хьиз, екебурни кхьизвай. Адан еке эсеррин арадай чавай “Афет” ва “Кузвай кьепIер” операйрин, оркестр галай фортепиано патал концертдин, симфониядин поэмадин, фортепиано патал вариацийрин, фортепианодин триодин ва масабурун тIварар кьаз жеда.

1964-йисуз Эльза Ибрагьимовади консерватория агалкьунралди акьалтIарна, адан дипломдин кIва­лах “Оркестрдихъ галаз фортепиано патал концерт” темадай тир.

Эльза Ибрагьимовадин манияр Рашид Бейбутов, Шевкет Алекперова хьтин бажарагълу манидарри тамамарна, къенин юкъуз а кIвалах Флора Керимовади, Ильгьама Къулиевади, Аким Исламзадеди давамарзава. Бажарагълу композитордин яратмишунриз Тихон Хренникова, Георгий Свиридова, Отар Тактакишвилиди, Джовдет Гьажиева, Ариф Меликова, Къара Къараева ва масабуру лап виниз тир къимет ганва­.

Консерватория акьалтIа­рай­да­лай кьулухъ Эльза Ибрагьимова Да­гъустандиз кIвалахал ракъурна. Са йис арадай фейила, ам Азербайжандиз хъфена.

Азербайжандин халкьдин шаир Мамед Рагьиман чIалариз кхьенвай  Эльзадин “Аллагьди гайиди” тIвар алай  сифте мани 1969-йисан 16-ап­релдиз милли радиодай бажарагълу манидар Шевкет Алекперовади тамамарна ва и маниди  композитордин тIвар халкьдин арада машгьурна. Композитордин “Эй, Ватан!” тIвар алай маниди Рашид Бейбутован репертуарда лайихлу чка кьуна­.

“ГьикI ятIани зи манийрикай ибарат концертдилай гуьгъуьниз заз Рашид Межидовича зенг авуна. Зун вуч ийидатIа тийижиз амукьна, вучиз­ лагьайтIа  адан бажарагъдиз за кьил агъузна икрамзавай. Машгьур манидарди за куьн винел кIвалах­заватIа хабар кьуна. А вахтунда за “Эй, Ватан!” тIвар алай цIийи манидиз музыка теснифнавай ва а мани за Бейбутоваз къалурун кьетIна. А вахтунда зи манийрин концертар тешкилзавайди зи стха Чингиз тир. “Эй, Ва­тан!” ва адахъ галаз са шумуд маса манини нотайралди кхьенвай чарар къачуна, стха Бейбутован патав фе­на. И йикъалай Рашид Бейбутовахъ галаз кIвалах­дин рекьяй зи сих ала­къа тайин хьана. Рашид муаллимди “Эй Ватан!” мани лап вини дережада аваз тамамарна. Рашид Бейбутов кечмиш хьайила, гьа манидин сесерик кваз кучудни авунай”, — ри­кIел хканай Эльза Ибрагьимовади.

1970-йисуз Эльза Ибрагьимова СССР-дин композиторрин Союздин членвиле кьабулна. 1988-йисуз адаз “Азербайжан Республикадин искусствойрин лайихлу деятель”, 2008-йисуз “Азербайжан Республикадин халкьдин артист” тIварар га­на. 1996-йисуз ба­жа­рагълу композиторди Шейх Шамилан 200 йисаз бахшнавай опера кхьена.

Эльза Имамединовна Ибрагьи­мова 2012-йисан 11-февралдиз 74 йисан яшда аваз рагьметдиз  фена, амма адан манияр яб гузвайбурун рикIера гьамишалугъ яз амукьда.

Эдуард Ашурагъаев, муаллим