И йикъара зун Герейханован 1 — хуьре яшамиш жезвай манидар Рамазанов Славикахъ галаз гуьруьшмиш хьана. Ам 1975-йисуз рабочий Рамазанов Бадиран хизанда дидедиз хьана. 1992-йисуз 11-класс куьтягьай жегьилди вичин уьмуьр медениятдин рекьиз бахшна.
Школада манияр лугьунин тарсар гузвай хуьруьнви муаллим Керимов Расулан гъилик кIелай ада, гьеле гъвечIизмаз манияр ягъиз, конкурсра, музыкадин кружокра, гьакI хуьруьнвийрихъ галаз совхоздин, культурадин кIвалин патай хуьре ва районда, гьакIни Махачкъаладани фестивалра иштиракна. ИкI, 1987-йисуз, 12 йиса аваз, Махачкъалада кьиле фейи фестивалда иштиракай Славика приздин чка кьуна. Октябрдин революциядин йикъаз талукьарнавай яратмишунрин фестивалда кIвенкIвечи чка кьуниз килигна, Москвадай талукь шагьадатнама гана. Школада, районда конкурсра иштиракиз, хъсан сес аваз акурла, гьеле 11 йиса авай жаван музыкантрин дестейри чпихъ галаз мехъеррик, шад межлисрик тухуз хьана. И карди адан руьгь мадни хкажна. Гьа икI Славик Рамазанов яваш-яваш манидаррин гегьенш жергейриз акъатна.
А вахтара алатар ягъиз, манияр лугьуз, мехъеррал физвай аялар лап тIимил авай. Славика вичин тангъахда авай ярар-дустарин арада усалвал авунач. КIвалин гьални фикирда кьуна, вичиз са рехъ жагъурна.
С.Рамазановаз манияр ягъун патал гагь са, гагь маса ансамблрин жергейриз эвериз хьана. Ада вич тухузвай тегьер, яр-дустарин арада гьуьрмет хьун, кьилинди, ширин сес акурла, Дагъустанда тIвар-ван авай “Дербент” ансамблдин регьбер, бажарагълу музыкант Мамедали Агъабалаева жегьил манидардиз вич кьиле авай ансамблдиз теклифна. Славика гьакIни “Аякам” ва цIудралди маса ансамблрани иштиракзава. Дагъустандин халкьарин, туьрк, узбек, азербайжан чIаларалдини манияр ада еке устадвилелди лугьузва.
Славик Рамазановаз хъсандиз тербияламишнавай 2 гадани са руш ава, абуру гьарда вичин рекьяй зегьмет чIугвазва. Чи мурад адан хизанда хушбахтвал мадни артух хьун я.
Вадим Жамалдинов
