Лезги халкьдин арадай бажарагълу инсанар гзаф акъатна. Гьакъикъатдани, аламатдин затI я бажарагъ. ГьикI лагьайтIа, гьар нивай хьайитIани манияр лугьуз, шиирар теснифиз, кьуьлер ийиз, далдам-чIагъан ягъиз жедач. РикIел Польшадин литературадин машгьур векилрикай сад тир Альфред Конара лагьай гафар къвезва: “Бажарагъ валай гьич садани чир тавунвай тайин са кIвалах ийиз алакьун я”.
Ихтилат, бажарагъ себеб яз, Лезгистанда машгьур манидар, СтIал Сулейманан районда вичиз гьахълудаказ “Халкьдин манийрин устад” лугьузвай Селимат Гьажиевадикай физвайди фикирда кьуна, заз лезги халкьдин арадай акъатай бажарагълу манидаррин тIварарни кьаз кIанзава: Рачаб Сафаров, Эслихан Агъаева, Жамал Шагьмарданов… Курхуьрелай тир рагьметлу Бесханум Гьажиевадин — Селиматан дидедин тIварни дамахдивди кьаз жеда. Райондин медениятдин кIвалин художественный самодеятельностдин иштиракчи яз, Б. Гьажиевади 50 йисалай виниз вахтунда халкьдиз къуллугъна. “Дагъустан Республикадин культурадин лайихлу работник” гьуьрметдин тIварцIиз лайихлу хьайи Бесханум Гьажиевадиз КIварчагърин хуьряй тир культработник ва шаир Салигь Селимова шиирни бахшнай:
Вуна билбил ийида бенд,
Ягъиз гьар аваз, Бесханум.
ЛагьайтIани “Сегьнедин гъед”,
Лайих тIвар я ваз, Бесханум.
Катран мукай кард къарагъда, — лугьузва халкьдин мисалда. Рагьметлу Бесханум Гьажиевадин руш Селиматакайни къе сегьнедин гъед хьанва.
— Закай культработник, манидар хьуниз зи дидеди авур таъсир екеди я, — лугьузва Селимат Гьажиевади. — Районда ва адалай къеце тухузвай медениятдин, шадвилерин мярекатра хьиз, дидедин сивел кIвалени гьамиша мани жедай. Мадни, заз дидедиз халкьдин патай авай кIанивал, гьуьрмет аквазвай. Гьавиляй за дидедин кар, рехъ давамарун кьетIна.
С.Гьажиевади и келимаяр лагьайла, рикIел шаир Рамазан Каитова кхьей цIарар къвезва: “Вичин дидед, бубад къадир авайди, лугьуда хьи я девлетар галайди”. Эхь, Селиматахъ къе “девлетар” ава, абур адан ширин сесиникай, лугьузвай манийрикай, халкьдин патай авай кIанивиликай ибарат я.
Манияр лугьуз С.Гьажиева Курхуьруьн юкьван школада кIелдай йисара гатIунна, школьникрин арада районда тухвай са шумуд конкурсдани ада кIвенкIвечи чкаяр кьуна.
Амма Селиматаз махсус чирвилер къачун патал я институтда, я училищеда кIелдай мумкинвал хьанач. Анра гудай чирвилер жегьил рушаз бажарагъди эвезна. Алакьунар, ширин сес, дидедин “тарсар” ва бажарагъ себеб яз 1996-йисуз Селимат Гьажиева райондин медениятдин кIвализ манидар яз кIвалахал кьабулна. Гьа йикъалай инихъ ада районда ва Кьиблепатан Дагъустанда тухузвай гзаф фестивалра, конкурсра ва культурадинни шадвилин маса мярекатра иштиракзава, алакьунар къалурзава.
— Зи рикI вилик йисара Рагьимат Гьажиевади, Эслихан Агъаевади, Дурия Рагьимовади ва машгьур маса манидарри тамамариз хьайи, гьакIни халкьдин куьгьне манийрал гзаф ала, — лугьузва Селимат Гьажиевади. — Гьавиляй зи репертуарда гьа манийри кьилин чка кьазва. Тамашачийри, иллаки жегьилри вилик йисарин манияр хушвилелди кьабулзава, ида зак шадвални кутазва. ГьикI лагьайтIа, куьгьне манияр чи халкьдин тарих я.
Гьа са вахтунда бажарагълу манидар С. Гьажиева райондин медениятдин кIвале кардик квай ва республикада машгьур фольклордин “Куьре” ансамблдин художественный руководителни я. 12 касдикай ибарат тир и коллективдин концертрин программайрани халкьдин манийри кьетIен чка кьазва. Имни, гьелбетда, Селимат Гьажиевадин кIвалахдин, алахъунрин, бажарагъдин нетижа я.
— За виликдай хейлин йисара Бесханум бахдихъ галаз санал гзаф кьадар фестивалра, мярекатра иштиракайди я. Гила и кар Селимат вахахъ галаз давамарзава, — лугьузва машгьур манидар, РД-дин культурадин лайихлу работник Ярагьмед Ярагьмедова. — Завай инанмишвилелди лугьуз жеда хьи, дидедихъ хьиз, Селимат Гьажиевадихъни кьетIен бажарагъ ава. Селимат вах чи дамах я.
Манидар Селимат Гьажиева Мегьарамдхуьруьн районда тухвай “Самурдин зул” фестивалдин, Дербентда тухвай “Дурия Рагьимовадин конкурсдин” лауреат, РД-дин культурадин министерстводин, “Шарвили” эпосдин суварин тешкиллувилин комитетдин, СтIал Сулейманан райондин администрациядин ва культурадин отделдин патай ганвай гзаф кьадар грамотайрин, дипломрин сагьиб я.
Вахъ кIвалахда, искусстводин рекье мадни еке агалкьунар хьурай, манийрин устад Селимат!
Хазран Кьасумов
