Инсаниятдин гуьзел пай тир дишегьлийриз цуьквер ярашугъ я. Суваррин йи­къа­ра абурув цуьквер гваз акурла, иллаки пара хуш жеда. “Къизилгуьлер хурув кьуна, багъда къекъвез шад я зун…”, — кхьизва Пакизат Фатуллаевади вичин “Беневша” шиирда.

Шикилдай кIелзавайдаз аквазвай ­мегьрибан дишегьли Эминхуьряй тир  Алла Ризаевна Буржалиевадини  (Гьа­­­ми­довади)  и йикъара, къизил­гуьлер хурув кьуна, вичин уьмуьрдин 55-гад шаддиз къаршиламишна.

А.Гьамидова яргъал йисара шофервиле кIвалахай Риза Халидовичан ва совхозда кIвенкIвечи уьзуьмчийрикай сад хьайи Ира Алиевнадин чIехи, гьуьрметлу хизанда дидедиз хьана. 1984-йисуз ада хуьруьн юкьван школа акьалтIарна. “Аламишин­ский” совхозда рабочийвиле кIвалахна.

1987-йисуз Алла заочнидаказ Дагъустандин культурадинни искусстводин колледждик экечIна, “Библиотекадин кар” пешекарвал къачуналди, 1989-йисуз анаг акьал­тIар­на. 1988-йисан майдилай инихъ ада райондин Гь.Алкадарскийдин тIварунихъ галай биб­лиотекайрин къурулушдин Эминхуьруьн библиотекадин заведующийвиле кIвалах­зава.

— Алла Ризаевна вичин пешедиз вафалувал къалурзавай, кIвалах хъсандиз чидай, агьалийрин патай гьуьрмет къазанмишнавай библиотекаррикай сад я, — лу­гьузва ЦБС-дин директор Назиля  Шихбабаевади. — Ада районда тухузвай гьар жуьредин мярекатрани активвилелди иштиракзава, вичин девлетлу тежриба жегьилризни чирзава. Алла Ризаевнадин кIвалах­дилай чун гзаф рази я.

А.Буржалиевадин чирвилер, тежриба, чалишмишвилер себеб яз, Эминхуьруьн библиотека агьалийрин рикI алай макандиз элкъвенва. Алай вахтунда ана 7571 ктаб ава. Библиотекадай ктабар къачуз кIелза-вайбурун кьадар 890-дав агакьзава.

Алла Ризаевнади библиотекада кIелза­вайбурун конференцияр, машгьур ксарихъ, ветеранрихъ, шаиррихъ галаз гуьруьшар, гьар жуьредин маса мярекатар кьиле тухузва. Мисал яз, алай йисуз библиотекада республикада милли чIалал акъатзавай “Лезги газетдин” — 100, райондин печатдин орган тир “Куьредин хабарар” газетдин 90 йисарин юбилейриз, лезгийрин рикI алай шаир Алирза Саидован 90 йис тамам хьуниз, Гъалибвилин йикъаз талукьарнавай мярекатар, РФ-дин журналистрин Союздин член Алаудин Гьамидован “Багьа чил — багьа накьвар”, и цIарарин автордин “Зуь­кIуьд булах”, Исмаил Агьмедован “Хутаргъар” ктабрин презентацияр, Афгъанистандин вакъиайрин иштиракчияр хьайи район­эгьлийрихъ,  “Чи чIал чи дамахни я, булах­ни” лишандик кваз “Куьредин хабарар” газетдин журналистрихъ ва Эминхуьруьн школадин муаллимар тир Гуьл­ханум Наврузовадихъ, Жейран Мирзоевадихъ ва шаир ФатIимат Османовадихъ галаз гуьруьшар ва маса мярекатар тухвана.

Библиотекада СтIал Сулейманан райондин 90 йис тамам хьуниз, Россиядин Игит Зейнудин Батмановаз, Етим Эминаз,  СтIал Сулейманаз, хуьруьн тарихдиз ва хуьряй акъа­тай машгьур инсанриз талукь  стендар, выставкаяр гьазурна. Абуруз ­библиотекадиз къвезвайбуру еке итиж  ­ийизва.

Алла Ризаевна вичин пешедал кьару инсан тирди мадни ихьтин са карди къалурзава. Ада вичи ва Эминхуьруьн библиотекадин кIелзавайбуру райондин центральный библиотекайрин къурулушда тухузвай саки вири мярекатра активвилелди иштиракзава. ИкI, и библиотекадин кIел­завайбур тир Мегьамедсалам Гьамидов “Шарвили” эпосдиз талукьарна тухвай конкурсда гъалиб хьунай мергьяматлувилин “Умуд” фондунин патай дипломдиз ва пулдиз, жуьреба-жуьре конкурсра гъалиб хьунай Селминат Кьасумова, Мадина Бабаева ва масабур грамотайриз лайихлу хьана. Идакни, гьелбетда, Алла Ризаевнадин зегьметдин еке пай ква.

Идалайни гъейри, 2021-йисуз А.Буржалиевади районда “Лучший антиэкстре­мист­ский и антитеррористический контент” лишандик кваз тухвай конкурсда приздин 3-чка кьуна, ам а чIаван райондин кьил Нариман Абдулмуталибован патай чухса­гъулдин чар ва пул гуниз лайихлу хьана. А.Буржа­лиевадин яргъал йисарин намуслу, бе­гьер­лу зегьмет 2011-йисуз Дагъустан Рес­пуб­ли­кадин Президент М.Мегьамедован тIвар кхьен­вай гъилин сят, “Дагъустандин гзаф мил­летрин культура вилик тухуник пай кутунай ва намуслу зегьметдай” РД-дин культурадин министр Зарема Бутаевадин къул алай (2020-йис) ва райондин ЦБС-дин, культурадин отделдин патай грамотаяр гуналди къейднава.

Уьмуьрдин 55 лагьай гад мубарак авуналди, чаз, А.Буржалиевадихъ элкъвена, лугьуз кIанзава: ви уьмуьрдин кьве ва­дакай кьве ях­цIурни цIуд, чандин сагъвал, хизанда хуш­бахт­вал хьурай, къизил­гуьлер хурув кьунвай­ гьуьрметлу Алла Риза­евна!

Хазран Кьасумов