Чи ватанэгьлияр — гьар сана
Вичин иервилел гьейранар ийиз тадай, кьетIен, юмшагъ сес авай манидар Эльмира Къарахановадихъ галаз зун 2-3 йис идалай вилик таниш хьана. Новокузнецкдай Москвадиз хтана, ада меркез муьтIуьгъарзава. П.Чайковскийдин тIварцIихъ галай Москвадин гьукуматдин консерваториядин къвалав гвай академический музыкадин училище (АМУ) яру дипломдалди куьтягьайдалай кьулухъ ам гьа и консерваториядик (МГК) экечIна.
2018-йисалай Эльмиради ЧIе-хи театрдин жегьилрин операдин концертра иштиракзава. 2018-йисуз М.Магомаеван тIварцIихъ галай международный 5 лагьай конкурсда бажарагълу манидар Эльмира (а чIавуз ам 18 йисан яшда авай) сад лагьай чкадал хьана. Жюридин кьиле акъвазнавайдини СССР-дин халкьдин артистка Тамара Синявская тир.
ГьакI манияр тамамариз алакьуни ваъ, гьар юкъуз чIугвазвай еке зегьметди, кIелуни, репертуар гегьеншаруни жегьил манидардиз агалкьунар гъизва. И кар Д.Вдовин хьтин машгьур муаллим-устад хьунилайни аслу я. Меркезда кардик квай ЧIехи театрдиз гьахьун патал гьихьтин алакьунар, чирвилер герек ятIа вири алемдиз малум я.
Лезги манидарди Ниццадин, Париждин, Израилдин ва маса уьлквейрин сегьнейрал манияр тамамарна.
Ингье и мукьвара адахъ мад са цIийи гъалибвал хьана! Алай йисан 26-апрелдиз манияр тамамарунин рекьяй Москвада Елена Образцовадин фондунин международный “Хосе Каррерас Гран-При” 2 лагьай конкурсдин финалдин пай кьиле фена. 30 уьлкведай 300 кьван иштиракчийри чпин арзаяр ракъурна, амма финалдиз анжаз 16 кас акъатна, гьа жергедай яз чи ватанэгьли Эльмира Къарахановани. Финалдиз акъатай гьар са иштиракчиди кьве мани тамамарзавай. Эльмиради (адахъ “сопрано” сес ава) “Снегурочка” ва “Богема” операйрин манияр тамамарна.
“Рен ТВ”, “ТАСС”, “Известия” чешмейри хабар гайивал, Эльмира Къарахановадин гъалибвал Россия патал сопранодай къазанмишнавай сад лагьай премия я.
Э.Къарахановадин бажарагъдал тажуб хьайи хейлинбуру чпин фикирар соцсетра кхьена.
“Яб акалзавайбур гьейранардай, суьгьуьрда твадай сес авай таватди вич дуьньядин сегьнейра мадни къалур хъийида”, — кхьенва музыкадал ашукь са касди.
Нубатдин гъалибвал къачурдалай кьулухъ зун Эльмирадихъ галаз гуьруьшмиш хьана. Ада дуьньядин дережадин машгьур конкурсдикай, ана иштиракуникай ихтилатна.
“Финалдал къведалди хьайи паяр вири гъвечIи залра кьиле фена, тамашачиярни лап тIимил, жюрини лап мукьув гвай. Амма финал концертдин къайдада, чIехи залда тешкилна. Финалда за гьевесдивди, асантвилелди, къалабулух квачиз мани тамамарна. Конкурсдиз килигиз Новокузнецкдай зи дидени атанвай. Муькуь багърияр конкурсдин кIвалахдиз чеб авай чкайра килигзавай”, — суьгьбетна Эльмиради.
Бажарагълу лезгиди вичин агалкьунар муаллимрин-устадрин алахъунрин, гьакIни вичин кьетIен зегьмет чIугунин нетижа я гьисабзава.
Къейд ийин, конкурсдин концертдин залда ацукьнавайбурун чIехи паюни Эльмира Къарахановадиз сес гана, идалайни гъейри, адаз интернетдани виридалайни гзаф сесер гана.
Алай вахтунда ам Москвада вичин вах Эльнарадихъ галаз яшамиш жезва; ваха В.Попован тIварунихъ галай хордин искусстводин академияда кIелзава. Эльмирадин рикI ктабар кIелунал, цIийи чирвилер къачунал, музейриз финал, чIалар чирунал ала. Къуй адахъ мадни еке агалкьунар хьурай!
Теяра Велиметова,
Урус словесностдин международный академиядин,
Россиядин писателрин Союздин член, “
Московиядин къизилдин къелем” премиядин сагьиб,
«Лезги газетдин» штатдик квачир мухбир
