Ахцегь райадминистрациядин 26-февралдин къарардалди, гъилевай йисан гатун каникулрин вахтунда хуьруьн аялриз чкадал менфятлудаказ ял ядай ва сагъламвал мягькемардай шартIар тешкилунин фикирдаллаз, райондин кьве школада аялрин йикъан лагерар ачухзава.
Ахцегьрин умуми образованидин асул школадин (директор — Мейрам Рамазанова) бинедаллаз са сменада 20 аялдиз чка жедай “Звёздочка” ва КьакIарин хуьруьн юкьван школадин (директор — Мейрудин Азизагъаев) бинедаллаз са сменада 60 аял кьабулиз жедай “Альтаир” лагерар ачухда.
Эхиримжи 5 йисуз гьар жуьре себебрикди районда ихьтин лагерар ачухиз тахьайди фикирда кьуртIа, им тебрикуниз лайихлу агалкьун я. Ада чи школайрихъ авай мумкинвилерин бинеяр мягькем хьанвайдан ва абуру санитариядинни тIугъвалрин жигьетдай ийизвай истемишунриз жаваб гузвайдан гьакъиндай шагьидвалзава. Гатун лагерра аялар кьабулиз гьазур хьунин вири кIвалахар 1-июндалди, яни аялар кьабулиз башламишдалди тамамдиз бегьемарун лазим я.
И йикъара чун, аялрин ял ягъун тешкилунин ва сагъламвал мягькемарунин рекьяй райондин идарайрин векилрикай ибарат уртах комиссиядин членар, лагерар аялар кьабулиз гьазур жезвай гьал ахтармишун патал чкайрал фена. Анра школайрин кьиле авайбурухъ ва муаллимрихъ галаз гуьруьшар хьана, кухняярни столовояр, классар, спортзаларни майданар авай гьалдиз килигна. Тайиндиз лугьуз жеда хьи, лагерар гьазур я. Комиссиядин членрин патай школайрин директорриз синихдин са гафни атанач.
Пуд вацра давам жезвай гатун каникулриз диде-бубайрин вилик акъвазнавай важиблу ва жавабдар месэлайрикай сад аялар куьчедин пис таъсирдикай хкудун, абурун сагъламвал хъсанарун, абурув менфятлудаказ ял ягъиз тун я. Асантди тушир, важиблу и месэла гьар са хизанди, вичин мумкинвилериз килигна, гьар жуьреда гьялзава.
Эхиримжи вахтунда иллаки шегьерра, аялрин итижриз килигна, абур патал жуьреба жуьре рекьерай клубарни лагерар ва санаторийрин комплексар ачухзава. Амма тежрибади тестикьарзавайвал, чи шартIара гатун каникулрин вахт аялдин руьгьдизни бедендиз жезмай кьван менфятлу хьун патал виридалайни хъсанди, регьятди жуван школайра тешкилзавай гатун лагерар я. И йисара абур ачухиз хьанач лугьуз, диде-бубайрин патай шикаятарни къвезвай.
Диде-бубайри чпин аялар патал школадин гатун лагерар хкягъунин сир-себеб вуч я?
Сад лагьайди, гзаф вахтара, диде-буба кIвалахрал алаз, абурувай каникулрин вири вахтунда кIвале аялриз ерилудаказ, менфятлудаказ ял ядай шартIар тешкилиз жезвач. Кьвед лагьайди, яшамиш жезвай чкадивай яргъа тир махсус лагердиз ва я сагъламвилин центрадиз ракъуризни игьтият ава: пара аялривай (иллаки сифтегьан классрин) чпивай чпин кьил хуьз жедач. Ахьтин лагеррин путёвкайрин къиметарни кесиб хизанриз ужуз туш.
Тафаватлу яз, школайра йикъан вахтунин лагеррин артуханвилер гьихьтинбур я лагьайтIа, кьилинди, аялар куьчедин ва телефон-интернетдин пис таъсирдикай хкатзава ва йифен вахтунда абур хизанда жезва. Ина аялар датIана муаллимрин тербиядик, гуьзчивилик ква. Махсус программадал бинеламиш хьана, абурухъ галаз менфятлу гьар жуьре мярекатар кьиле тухузва: спортдин акъажунар, хайи ерияр чирдай сейр авунар, концертар, итижлу гуьруьшар… Лагерда аялар нисинин кфетлу тIуьнралди таъминарзава ва икI мад.
Эхирдай къейд ийин хьи, райондилай къецени РД-дин образованидин министерстводин хиляй гатун лагерар кардик кутазва. Гьелбетда, анриз бюджетдин, яни пулсуз путёвкаярни ава. Абурукай менфят къачун патал диде-бубайривай Ахцегь РУО-диз арзаяр гуз жеда.
Дашдемир Шерифалиев
