Абурухъ инанмиш хьунин асул мана вуч я?
Малаикар Аллагьдин лукIар я. Абуру незвач, хъвазвач, абур ксузвач, эркек-дишивилин чаравал, ашкъи-гьевес авач, эвленмиш жезвач. Аллагьдиз муьтIуьгъ я, гьамиша Аллагьдиз зикир ва маса ибадатар ийизва. Абур рекьида ва дувандин юкъуз абурал чан хкида; абур ишигъдикай (нурдикай) халкьнава; абурай цавар ва чилер ацIанва, абурун кьадар анжах Аллагьдиз чизва. Малаикривай гьар жуьредин къаматар кьаз жезвалда, Аллагьди абуруз чIехи алакьунар ганва. Гьар садаз вичин везифа ава лугьуда.
Малаикар авайди куь тестикьарзава?
Чаз абур авайди Къуръандай ва гьадисрай чир жезва. Къуръанда ва гьадисра гьакъикъат ава.
Малаикрихъ инанмиш тахьайтIа, инсандиз вуч жеда?
Малаикар авач лугьузвай ва я идан патахъай шаклу жезвай кас имансузвиле гьатзава. Эгер ада туба тавуртIа, Эхиратда ам гьамишалугъ жегьеннемдикай къутармиш жедач. РикIин сидкьидай келима-шагьадат гъана, малаикар авайдахъ инанмиш хьана кIанда.
Къуръанда ва гьадисра тIварар кьунвай малаикрикай
Жабраил Аллагьдин эмирар пайгъамбаррал агакьарзавай малаик я.
Микаила махлукьатриз ризкьи пайзава.
Исрафил Сурдай (турбадай) гьараюн тапшурмишнавай малаик я.
Азраилдал (Малак-уль-мавт) Аллагьди руьгьер вахчун тапшурмишнава. И кьуд малаик чIехибур я.
Мункарани Накира сурун суал тухузва.
Ракъиб-Атид гьамиша инсандихъ галай, адан пис ва хъсан амалар кхьизвай малаикар я.
Малик — жегьеннем хуьзвай малаик.
Ризван — женнетдин крар кьиле тухузвай малаик.
Забаният — Эхиратда гунагькарриз жаза гун тапшурмишзавай малаик.
Хазанат-уль-Жаннат — женнет хуьзвай малаикар.
Гьамалат-уль-Арши — Арш кьунвай муьжуьд малаик.
Винидихъ тIварар кьурбурулай гъейри, мад гзаф малаикар ава лугьуда, абурай ирид цавар, чилер ацIанвалда. Абурун везифаяр анжах са Аллагьдиз малум я. Элкъвена Арш кьунвай ва датIана Аллагьдиз зикирзавай малаикарни ава. Гьар юкъуз Байт аль-Маъмурдин (цаварал алай Кябе) патав къвезвай ва ана Аллагь Тааладиз ибадат ийизвай малаикарни ава.
«Ас-салам» газетдай
