Тlвар-ван авай алимрин жергеда авайбурукай сад экономикадин илимрин доктор, Россиядин естествознанидин академиядин профессор Жаннет Сергоевна Шихалиева я.
Жаннет 1970-йисан 30-апрелдиз Махачкъалада дидедиз хьана. 1992-йисуз ада В.И.Ленинан тlварунихъ галай Дагъустандин госуниверситет “Экономическое и социальное планирование” пешедай тафаватлудаказ куьтягьна. 1994-йисуз ам и вузда аспирантурадик экечlна. 1997-йисуз адаз университетдин диссертацийрин советди гайи экономикадин илимрин кандидатвилин илимдин дережа РФ-дин образованидин министерстводин аттестациядин комиссияди тестикьарна. 2001-2015-йисара Жаннет Шихалиева Москвадин гуманитарно-экономический институтдин Минеральные Воды шегьерда авай Кеферпатан Кавказдин филиалдин финансринни кредитдин кафедрадин заведующий хьана. 2015-йисалай гьа и институтдин экономикадинни менеджментдин уртах кафедрадин кьиле акъвазнава.
Дерин чирвилер авай жегьил алимди 2010-йисуз экономикадин илимрин докторвилин дережа къачуна. Ам 8 монографиядин, 6 пособидин, илимдин ва методикадин 145 кlвалахдин автор ва соавтор я. Вич автор яз ва масабурухъ галаз санал кхьей адан ктабар Махачкъалада, Пятигорскда, Ставрополда, Минеральные Воды шегьерда ва масанра чапдай акъатнава.
Лезги алимдин лайихлувилер “Россиядин къизилдин кафедра” дипломдалди, “РАЕ-дин илимдин ва образованидин лайихлу къуллугъчи” тlвар гуналди къейднава.
Жаннет Шихалиевади экономикадин ва финансрин хиле кьиле тухузвай педагогвилин кlвалахар себеб яз, Европадин илимдинни промышленный палатадин образованидинни илимдин отделди институтдин финансрин ва кредитдин кафедра медалдалди ва дипломдалди къейдна. Им Европадин лап машгьур наградайрикай сад я. Алимдихъ илимдинни образованидин рекье къазанмишнавай наградаяр мадни ава, гьа жергедай яз — Ставропольский крайдин образованидин министерстводи пешекарар гьазуруник чlехи пай кутунай гайи гьуьрметдин грамотани. Адахъ “Машгьур алимар” энциклопедиядин иштиракчи тирвилин шагьадатнама ава.
Куругъли Ферзалиев
