Сулейман-Стальский райондин кьил Н.Абдулмуталибова лезгийрин бажарагълу шаир, РФ-дин писателрин союздин член Майрудин Бабахановаз 60 йисан юбилей тебрикна. Тебрикдин гафар лагьайдалай кьулухъ, райондин кьили шад гьалара юбилярдив тlвар кхьенвай сят ва шаирдин уьмуьрдинни яратмишунрин рекьикай ихтилат физвай «Кьве сеферда бахтлу инсан» ктаб вахкана.

Къейд ийин, тlвар кьунвай ктаб И.Яралиеван «Умуд» мергьяматлувилин фондунин такьатрихъ чапдай акъуднава, адан автор лезгийрин шаир ва алим Азиз Мирзабегов я.

Райондин кьили М.Бабахановаз лезги эдебиятдик кьетlен пай кутунай, хайи меденият таблигъ авунай чухсагъулдин келимаяр лагьана, гележегда мадни кьакьан кукlушрихъ агакьун алхишна. Н.Абдулмуталибова къейд авурвал, гьакъикъатдани, Майрудин Бабаханов чlехи алакьунар авай шаир ва халисан ватанперес я.

«Лезги газет»