Дагъустандин культурадин ва чIаларин йикъаз талукь яз ва Сулейман-Стальский райондин халкьдин яратмишунрин фестивалдин сергьятра аваз Кьасумхуьрел Россиядин халкьарин адетдин культурадин центрада лезгийрин къадим халичайрин выставка хьана. И кардин гьакъиндай “Лезги газетдиз” райондин администрациядин пресс-къуллугъди хабар гана.
Къейдайвал, фестивалдин кьилин везифа халкьдин гъилин пеше арадал хкун, гам-халича хурунин искусстводал фикир желбун, гьакIни районда и сенят виликди тухун патал государстводин патай пулдин такьатрин куьмек жагъурун я.
Гьакъикъатдани суварин тегьерда кьиле фейи мярекатдиз райондин вири хуьрерин агьалияр, администрацийрин ва идарайрин регьберарни къуллугъчияр атанвай. Выставкадиз муниципальный райондин кьил Нариман Абдулмуталибов, райондин Общественный палатадин председатель Алимет Мейланов, Лезгийрин СтIал Сулейманан тIварунихъ галай госмуздрамтеатрдин кьилин режиссёр Мирзебег Мирзебегов, райондин вилик-кьилик квай, яратмишунрал машгъул ксар килигна.
Культурадин кIвалин вилик квай майдандал хуьрерин культурадинни ял ягъунин центрайрин ва райондин центральный библиотекадин къуллугъчийри халкьдин къадим шейэр, алай аямдин устIарри хранвай, гьакIни музейрин экспонатриз элкъвенвай куьгьне гам-халича, надир нехишар алай къаб-къажах, хуьруьн майишатда ишлемишиз хьайи алатар ва маса шейэр эцигнавай, тамашачийриз абурун тарихдикай, метлебдикай суьгьбетзавай, мугьманриз лезгийрин милли тIуьнар теклифзавай, манияр тамамарзавай, кьуьлерзавай. Гьуьрметлу мугьманар гьар са майдандихъ галаз таниш жезвай, КДЦ-рин коллективри райондин кьилихъ галаз хуьр-кIвал, агьалийрин дуланажагъ патал важиблу месэлайрайни суьгьбетарзавай. Аялрин художественный школадин, яратмишунрин кIвалин векилри ктабрин ва чпи туькIуьрнавай шейэррин выставкаярни ачухнавай.
Лезгийрин адетдин нехишар аваз райондин устIарри хранвай чичIедин ва чIичI авачир гамарини тамашачийрин фикир желбзавай. Устадри къейд авурвал, гамарал алай икьван девлетлу нехишар кьетIен лишанрин куьмекдалди арадал атанва ва гьардахъ вичин манани ава. Нехишар геометриядин къайдайри истемишзавайвал дуьзбур, рангарин ва цIарарин пайгарвал хвенвайбур я.
ХъенчIин къаб-къажах гьазурунин рекьяй художник Набиулагь Керимханова кьиле тухвай мастер-классди суварин мярекатда кьетIен чка кьуна. Адан тупIари арадал гъизвай гьар жуьредин къапариз килигунилай гъейри, мугьманривайни и карда чпин алакьунар ахтармишиз жезвай. Мярекатдин иштиракчийри Испикрин устIарри арадал гъанвай хъенчIин къапаризни еке итиж ийизвай.
Майданрин иштиракчийрихъ галаз суьгьбетардайла райондин кьил Нариман Абдулмуталибов суварин метлебдал акъвазна.
— Милли меденият арадал хкунин, ам хуьнин ва гележегдин несилрив декоративно-прикладной искусстводин гуьрчег жуьреда, гам-халича хурунин тегьерда асирралди арадал атанвай чи адетар агакьарунин карда и сувари еке роль къугъвазва. Гъилин сеняткарвилери халкьдин уьмуьрда гьамиша важиблу чка кьаз хьайиди я. Гьар са шейини лезги халкьдин еке зегьметкешвал, гуьзелвал гьиссунин жигьетдай адахъ авай кьетIен бажарагъвал лишанламишзава, — къейдна Н.Абдулмуталибова.
Лезги театрдин кьилин режиссёр Мирзебег Мирзебегова, райондин культурадин отделдин начальник Майрудин Бабаханова чпин рахунра лезгийрин гам-халича хурунин сеняткарвал вилик финин тарихдикай суьгьбетна ва районда гьар йисуз лезгийрин халичайрин фестиваль кьиле тухунихъ, Дагъустандин культурадин ва чIаларин югъ тешкилунихъ милли меденият ва чIалар хуьнин карда авай метлеб къейдна.
Чи мухбир
