Хуьруьн майишатдин мумкинвилер артухарун патал Мегьарамдхуьруьн район некьияр гьасилунални элячIнава. Идакай муниципалитетдин администрациядин пресс-къуллугъди хабар гузва.
Райондин кьил Фарид Агьмедова хуьруьн майишатдин цIийи жуьредин хилер виликди тухунин жигьетдай ганвай теклифрал амал авуналди, районда некьияр гьасилиз башламишна 2 йис хьанва.
Идалай вилик абур 3,5 гектар майданда кутунвай. Алай вахтунда районда 6 гектар чилел некьияр цуниз гьазурвал аквазва.
Малум тирвал, хуьруьн майишатдин суьрсет гьасилзавай гьар са касдиз чизва хьи, кьилинди арадал гъанвай бегьер маса гун я. Некьийриз муьштерийри ийизвай итиж екеди хьуниз килигна, ам гьасилзавай майданар гегьеншарзава. Асул гьисабдай некьийрин са сезонда са шумуд сеферда бегьер гудай жуьредин сортар (ремонтантный) битмишарзава.
Райондин лежберри некьияр чIулав шихиник (спанбонд) кутуна цазва. Ада чилик яргъалди кьеж хуьзва, набататар шуькьуьнтрикай, маса гьашаратрикай ва аязрикай хуьзва. Идалайни гъейри, материалдин кIаник квай чIуру хъчарни терг жезва.
Къейд ийин, йисан кьиляй-кьилиз некьияр битмишарун хийир гъизвай бизнес я. ГьикI лагьайтIа, сезондин вахтунда 1 гектар чилелай 20 тонндив агакьна некьияр кIватIиз жезва.
«Лезги газет»
