4-декабрдиз Дагъустандин Кьил Владимир Васильеван регьбервилик кваз Дагъустан Республикадин терроризмдиз акси комиссиядин заседание хьана.
Анал Дагъустан Республикадин агьалияр законсуз яракьлу тешкилатрин кIвалахда иштиракун патал Россиядин Федерациядин сергьятдилай къецепатаз финиз рехъ тагунин серенжемрин, гьакIни Мукьвал тир РагъэкъечIдай патан уьлквейрин мулкарал женгинин гьерекатар кьиле физвай чкайрай Дагъустан Республикадиз хквезвай ксарихъ галаз тухузвай гъавурдик кутунин кIвалах хъсанарунин гьакъиндай месэладиз килигна.
Заседание ачухай республикадин регьберди веревирд ийизвай тема лап важиблуди тирди къейдна. Алай вахтунда гъиле авай делилралди, Мукьвал тир РагъэкъечIдай патан уьлквейрин, асул гьисабдай Сириядин ва Иракдин мулкарал международный террориствилин организацийрин (МТО) кIвалахда Дагъустандин 1500-далай виниз агьалийри иштирак авурди тайинарнава. Абурун чIехи пай 25-30 йисан яшда авай жегьилар я. Абурун са кьадар пай виликдай Мукьвал тир РагъэкъечIдай патан уьлквейриз фейи ва анра диндин чирвилер къачур ксар я.
Дагъустандин агьалийри МТО-рин кIвалахда иштирак авунихъ галаз алакъалу къурхулувилер жезмай кьван тIимиларунин мурадралди республикада жегьилар Сириядиз финиз рехъ тагунин рекьяй информационно — пропагандиствилин кIвалах тухузва.
Владимир Васильеван гафаралди, республикадин къанун-къайда хуьдай органри НАК-дихъ галаз санал террориствилин къурхулувилер арадай акъудунихъ, республикадин агьалияр МТО-рин кIвалахда иштирак авун патал маса уьлквейриз финиз рехъ тагунихъ элкъуьрнавай серенжемар кьилиз акъудзава.
И рекьяй къанун-къайда хуьдай органри тухузвай кIвалахдикай РД-дин къенепатан крарин министрдин везифаяр вахтуналди тамамарзавай Дмитрий Гутыряди гегьеншдаказ суьгьбетна.
Министерстводихъ авай делилралди, къанун-къайда хуьдай маса органрихъ галаз санал кьиле тухузвай гел жагъурунин ва тагькимарунин серенжемрин нетижада МТО-рин къурулушдик кваз женгинин гьерекатра иштиракун патал Сириядин Араб Республикадиз финин алахъунар авур 84 кас тайинарна ва абур уголовный жигьетдай жавабдарвилиз чIугунва, гьа гьисабдай цIинин йисуз – 11 кас.
Энгел тавуна, гел жагъурунин серенжемар кьиле тухудай чIавуз МТО-ра иштирак авурдалай гуьгъуьниз Сириядин Араб Республикадай 129 кас хтанвайди тайинарна ва абур кьуна. Алай йисуз – 9 кас.
Дмитрий Гутыряди мадни малумарайвал, ФСБ-дин региональный управленидин ва МВД-дин къуватралди, МТО-рин кIвалахдихъ галаз алакъа авай ксар дуьздал акъудунин, МТО-рин кIвалахда иштирак авун патал республикадин агьалияр желб ийизвай рекьер тайинарунин ва абур агалунин жигьетдай гел жагъурунин махсус серенжемар кьабулзава.
«Лезги газет»
