7-апрелдиз Махачкъалада, Р.Гьамзатован тIварунихъ галай милли ктабханада, лезгийрин машгьур шаир, филологиядин илимрин доктор, Урусатдин писателрин Союздин член, РД-дин культурадин лайихлу работник, “Шарвили” премиядин лауреат Фейзудин Рамазанович Нагъиеван 70 йис тамам хьуниз талукьарнавай мярекат кьиле фида.
Шииратдин межлисда республикадин жемиятдин, яратмишдай интеллигенциядин, илимдин векилри, студентри, мектебра кIелзавай аялри, милли шииратдал рикI алайбуру иштиракда. Мярекат нисинин сятдин 3-даз (15:00) гатIунда.
Къейд ийин хьи, Ф.Нагъиеван къелемдикай лезги ва урус чIаларалди шииратдин, гьикаятдин, драматургиядин, публицистикадин, илимдин 30-далай виниз ктабар хкатнава. Алай вахтунда алимди ДГУ-дин филологиядин факультетдин урус ва Дагъустандин чIаларин отделенида кIвалахзава.
«Лезги газет»
