Чи машгьур ватанэгьли — педагог, писа­тель­, алим, критик, энциклопедист Къурбан­­  Аки­мован  80 йисан юбилейдиз талукь яз Махачкъалада, Р.Гьамзатован тIварунихъ галай Милли библиотекада, илимдин сессия кьиле фена. Милли библиотекадин­ кон­фе­ренцийрин залда юбилярдин гзаф ярар-дустари, танишри, мукьвабуру, ше­гьердин ва районрай атанвай муаллимри чкаяр кьунвай.  Абур юбилярдиз бахшна туькIуьрнавай выставкадихъ галаз таниш хьана. 

Мярекат библиотекадин край чирдай ва милли эдебиятдин отделдин кьилин библиотекарь Секинат Мусаевади юбилярдикай суьгьбет авунилай башламишна, А.А.Тахо-Годидин тIварунихъ галай Дагъустандин педагогикадин илимдинни ахтармишунрин институтдин директордин заместитель, педагогикадин илимрин доктор Меседу Шурпаевади ам кьиле тухвана.

Къурбан Акимован зурба ирсиникай, институтда вирибуруз чешне тир къуллугъчидикай рахана.

Гзаф йисара ДНИИП-дин директор хьайи Дагъустан Республикадин Халкьдин Собранидин ­депутат Гьамидуллагь Ме­гьа­медова  Къурбан Акимовакай яр-дустуникай ва еке бажарагъ авай касдикай хьиз суьгьбетна, юбиляр Да­гъустандин ва лезгийрин эдебиятдин методикадин диб эцигайди, образова­нидин тешкилатчи тирди къейдна ва РД-дин Халкьдин Собранидин патай тебрикдин чар кIелна.

Алимдин илимдинни методикадин кIва­лахдикай ДНИИП-дин дидед чIаларин сектордин заведующий, филологиядин илимрин кандидат Низами Сафаралиева, яратмишунрикай­ Дагъустандин ктабрин издательстводин кьилин редактор, Дагъустандин халкьдин ша­ир Арбен Къардаша, литературовед-критикдикай хьиз филологиядин илимрин кандидат Заира Къурбановади кар алай докладар авуна.­

Юбилярдикай фильм туькIуьрнавай машгьур журналист, ДГУ-дин муаллим Алик Аб­дул­­гьамидова Гьаким Къур­банан яратмишунринни ахлакьдин, инанмишви­ле­рин алемдикай суьгь­бет­на­.

Мярекатдал ДГУ-дин профессор Гьажи Гашаров, Да­гъустандин халкьдин духтур Азедин Эсетов, ДНИИП-дин культурадин ва искусстводин сектордин заведующий Марат Байрам­бегов, ДГПУ-дин профессорар, Шайдабег Мирзоев, Загьир ва Вали Загьировар, ДНИИП-дин дидед чIала­рин сектордин заведующий ­Хай­булла Вакилов, ДГТУ-дин кафедрадин заведующий, экономикадин илимрин доктор, Лезги халкьдин илимдин ва культурадин ­деятелрин ассоциациядин председатель Абдулгьалим Абдулгьалимов, Лезги пи­сателрин союздин правленидин председатель, шаир Максим Алимов, Герейханован хуьруьн 1-нумрадин школадин муаллим Сегьерханум Османова, гене­рал-полковник Мегьамед Танкаеван тIва­рунихъ галай Фондунин председатель Гьасан-Гьуьсейн Аб­дулжалилов, Махачкъаладин 38-нумрадин гимназиядин муаллим Алимат Баламирзоева, “Лезги газетдин” литературадин отделдин редактор, шаир, юбилярдиз бахшнавай “Халикьдин хва” ктабдин автор Мердали ­Жалилов, ­Курхуьруьн школадин муаллим Гуьзел Межидова, Махачкъаладин 10-нумрадин школадин муаллим Эльвира Сев­зиханова ва гзаф масабур рахана, юбилярдиз шабагьар, грамотаяр, тебрикрин чарар гана. Абуру чеб Къурбан Акимовахъ ва адан яратмишунрихъ галаз таниш хьайивал рикIел хкана.

Гьажи Гашарова чи вилик квайди чан алай классик тирди къейдна. Инал рахай са­ки гьар сада Гьаким Къурбанан вири ктабар урус чIа­лаз таржума авуна, санал чапдай акъудун лазим тирдакай лагьана. Мяре­катдал авур докладар, рахунар кьилди ктабда гьатда.

Илимдин сессиядилай кьулухъ тебрикар, шадвилер мярекатдин кьвед лагьай паюнани давам хьана.

Эмираслан Шерифалиев