И йикъара чав Ахцегьай чIулав хабар агакьна: 89 йисан ящда аваз, чи халкьдин алай девирдин нуфузлу рухвайрикай сад, общественно-политический деятель, дяведин ва зегьметдин ветеран, машгьур тешкилатчи ва насигьатчи, яргъал йисара партиядинни советрин регьбервал гудай къуллугърал хьайи коммунист, ватанперес ва инсанперес, интернационалист, халисан дипломат Абдул-Къафар Исакьович Агьмедов рагьметдиз фена. Ам чидай вирибуру яс чIугвазва, адан хизанриз, багърийриз сабурар гузва.
А.-Къ.И.Агьмедов 1929-йисуз Бакуда, ахцегьви нефтяникдин хизанда дидедиз хьана. Ада 1948-йисуз Дербентдин 1-нумрадин юкьван школа, 1953-йисуз Махачкъалада ДСХА-дин ветеринариядин факультет, 1963-йисуз Москвада КПСС-дин ЦК-дин патав гвай ВПШ куьтягьна. Адалай кьулухъ вири уьмуьр чи республикадин экономика, культура, яшайишдин хилер виликди тухунин тешкилатчидин рекьерихъ галаз алакъалу авуна.
Иллаки партиядин Ахцегь райкомдиз регьбервал гайи йисар бегьерлубур хьана. Тарихда гьатнавайвал, а йисара Ахцегь район ва райондин центр (а чIавуз Докъузпара районни иник квай) виликди фена, Ахцегьиз дагълара авай шегьер лугьузвай. Ина багъларин майданар, маларинни хиперин кьадарар са шумудра артухарна, нек, як, ниси гьасилдай комплексар эцигна, чилер дигидай къаналар, цIийи рекьер, муькъвер, цехар кардик кутуна, цIийи клубар, школаяр эцигна, спортдин майданар, залар ачухна…
Ахцегь райондиз КПСС-дин ЦК-дин, СССР-дин Верховный Советдин ва Министррин Советдин гьамиша хуьдай Яру пайдах, ДАССР-дин гъиляй-гъилиз фидай са шумуд пайдах, маса наградаяр гана.
Абдул-Къафар Исакьович са шумудра ДАССР-дин Верховный Советдин депутатвиле, КПСС-дин Дагобкомдин членвиле хкяна. Адан агалкьунар государстводин чIехи наградаяр, тIварар гуналди къейдна.
Ам экономикадин илимрин кандидат, РД-дин лайихлу экономист, Ахцегь ва ЦIумада районрин гьуьрметлу гражданин тир.
1990-йисарилай инихъ Абдул-Къафар Исакьовича вичин вири къуватар ва чирвилер общественный кIвалахрал, жегьил несилар халисан ватандашар яз тербияламишунал желбна. Ада Дагъустандинни Азербайжандин арада дуствилин алакъаяр мягькемарунин Общество арадал гъана, вичикай анин президент хьана.
Дуствилинни культурадин, экономикадин, тербиядин месэлайрай ада са шумуд ктаб, цIудралди макъалаяр кхьена. Вири йисара “Лезги газетдихъ”, “Самур”, “Кард” журналрихъ, маса изданийрихъ, яратмишдайбурун союзрихъ галаз сих алакъаяр хвена.
Гьелбетда, чIехи рикIе мадни чIехи фикирар, умудар авай. Амма ажалдиз мажал чидач. Чна рагьметлудан хизанриз, мукьва-кьилийриз, багърийриз, вири ахцегьвийриз башсагълугъвал гузва.
Абдул-Къафар Исакьович Агьмедован экуь къамат чи рикIелай садрани алатдач.
«Лезги газетдин» редакциядин коллектив
