Саласадиз республикадин меркезда Дагъустандин Кьил Владимир Васильеван регьбервилик кваз РД-дин Хатасузвилин Советдин заседание кьиле фена. Анал шегьре рекьера хатасузвал таъминарунин ва тIугъвалдихъ галаз алакъалу шартIара улакьрин гьерекат манийвилер авачиз тешкилунин месэлаяр веревирдна.
Вичин рахунра РД-дин МВД-дин кьил Абдурашид Мегьамедова къейд авурвал, республикада коронавирусдихъ галаз женг тухун патал кьабулнавай серенжемрин сергьятра аваз ведомстводи са жерге мярекатар кьиле тухузва. Асул гьисабдай, абур республикадин мулкара авай рекьера улакьрин гьерекат сергьятламишунихъ галаз алакъалубур я. Министрдин гафаралди, абуру шегьре рекьера хатасузвал хуьнин карда куьмекна. Тек са алатай вацра рекьерал жезвай аварийрин кьадар 48 процентдин тIимил хьана, аварийрин нетижада инсанар телеф хьунин рекъемни кьве сеферда агъуз аватна.
Заседанидал малум хьайивал, республикада улакьрин гьерекат сергьятламишун патал стационардин 128 пост кардик кутунвай ва санай масаниз фидай мобильный 40 десте арадал гъанвай. Росгвардиядин ва къенепатан органрин 1700 къуллугъчи желбнавай. Тек са Махачкъалада стационардин 40 пост кардик кутунва ва анрал, санлай къачурла, полициядин 440 къуллугъчи желбнава.
Абдурашид Мегьамедова алава хъувурвал, Дагъустандин шегьеррани районра улакьрин гьерекатрин вилик пад кьун патал рехъ агалдай махсус блокрикай менфят къачуна. Министерствода гьар юкъуз и кIвалахдиз къимет гузва. Ихьтин серенжемрин нетижада агьалийри карантиндин (кIвалера амукьунин) къайдайрал амал авунин дережа са шумуд сеферда артух хьана.
Владимир Васильева МВД-ди кьиле тухузвай кIвалахдин жигьетдай вичин разивал къалурна. Ада къейд авурвал, духтурри, чпин сагъламвал хаталувилик кутуна, дагъустанвияр сагъар хъийизва, полициядин къуллугъчийри рекьерал кьабулзавай серенжемри тади куьмекдин улакьрин са манийвални авачиз санай масаниз фидай мумкинвилер яратмишзава.
“Республикада тIегъуьндихъ галаз алакъалу яз тайинарнавай къайдайрал амалзавай виридаз за сагърай лугьузва. Чи виридан умуми алахъунар себеб яз, яваш-яваш гьалар хъсан патахъ дегиш жезва”, — лагьана Владимир Васильева МВД-дин кIвалах ва ведомстводин хивевай жавабдарвал къейд авуналди.
Абдурашид Мегьамедова Махачкъала шегьердин къене авай постар алуддай къарар кьабулнавайдакай, гьа са вахтунда шегьердиз гьахьзавай чкайрал алай постар кардик кумукьдайдакай хабар гана.
Владимир Васильева Махачкъаладинни Каспийскдин арада авай шегьре рекьени улакьриз санай масаниз физ са манийвални амукь тийидайдакай лагьана. Адан фикирдалди, и карди республикадин меркезда улакьрин гьерекат къайдадик хьуниз таъсирда. Амма шегьерризни районриз гьахьзавай сергьятриз талукь яз серенжемар кардикай хкудиз гьеле фад я.
“Ша чна са тIимил вилив хуьн хъийин. Гьелелиг тIугъвалдин хаталувал михьиз алатнава лугьуз жедач. И кардихъ галаз алакъалу яз, муниципалитетрин сергьятрал эцигнавай постари кIвалах давамарда”, — алава хъувуна региондин Кьили.
«Лезги газет»
