2-июндиз Махачкъалада Дагъустандин Кьил Владимир Васильева кьиле тухвай заседанидин сергьятра аваз, ЧIехи Гъалибвилин 75 йис тамам хьуниз талукь яз кьушунрин женгинин параддиз гьазурвал акунин ва ам кьиле тухунин месэлаяр веревирдна.
“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, республикада Гъалибвилин парад 24-июндиз Каспийск шегьерда кьиле тухуда. И кардиз гьазурвал акуникай гегьеншдиз Каспийскдин Флотилиядин командующий Сергей Пинчука суьгьбетна.
— Урусатдин Президент Владимир Путинан тапшуругъдалди, уьлкведа парад 24-июндиз кьиле фида. 1945-йисан 24-июндиз Москвада ва игитдин тIварар гайи шегьерра Гъалибвилиз бахшнавай сад лагьай параддин мярекатар тешкилнай. Гъалибчийрин параддиз маршал Рокоссовскийди регьбервал ганай ва ана маршал Жуковани иштиракнай. Гьавиляй 24-июнь тарихдин метлеб авай вакъиа кьиле фейи югъ я, — лагьана С.Пинчука.
Адан гафаралди, Каспийскда кьиле фидай парадда иштиракун патал оборонадин министерстводи — 1062, амай министерствойринни ведомствойри 370 кас желбда. Идалай гъейри, парадда техникадин — 33, авиациядин — 10 уьлчмеди, 7 гимиди иштиракда.
Мярекат 24-июндин экуьнин сятдин 10-даз гатIунда. Нянин сятдин 10-даз Каспийскда цавуз артиллериядин салют ахъайда. Параддиз Каспийскдин Флотилиядин штабдин начальник, контр-адмирал Николай Якубовскийди регьбервал гуда.
«Лезги газет»
