25-декабрдиз Ахцегьа республикадин са райондани авачир хьтин гегьенш, гуьзел “Набережный” ва Мукьтадир Айдинбегован тIварунихъ галай цIийикIа туькIуьр хъувунвай паркар ачухна. Къейд ийин хьи, ихьтин мумкинвилер РД-дин Кьил Владимир Васильеван теклифдалди арадал гъайи “Зи Дагъустан — шегьердин къулай шартIар” программади гана.
Шадвилин мярекат Байрамован куьчеда цIийикIа туькIуьр хъувунвай Мукьтадиран тIварунихъ галай ял ядай багъ ачухунилай гатIунна. Гуьгъуьнлай жемят ва мугьманар Ахцегь вацIун кьере, Абдулжелил Идрисован куьчеда кутунвай цIийи багъда (цIийи паркуна) кIватI хъхьана. Мярекатда “Ахцегь район” МР-дин кьил Осман Абдулкеримова, райсобранидин председатель Абдул-Керим Палчаева, Докъузпара ва Рутул районрин регьберар тир Ибрагьим Ибрагьимова, Агьмед Агьмедова, райондин идарайринни карханайрин коллективри, хуьрерай чкадин администрацийрин делегацийри, жемятди, СМИ-дин векилри иштиракна.
Шадвилин мярекат О.М.Абдулкеримова ачухна.
— Гьуьрметлу районэгьлияр, мугьманар! Къе дагълух райондин агьалийриз шегьерда хьтин къулай шартIар яратмишдай мумкинвал хьунал чна шадвалзава. ЦIийи парк — им районэгьлийривайни мугьманривай ял ягъиз жедай къулай чка я. И мураддалди гьеле гиламаз паркуна лазим тир вири шартIар тешкилнава, гележегда чна ам мадни хъсанарда. Чпин кIвалах гьакъисагъвилелди авур устIарарни фялеяр, абуруз чпелай алакьдай куьмекар авур чи идарайринни карханайрин коллективар сагърай!
Ахцегь район яшайишдинни экономикадин рекьяй вилик тухунай РД-дин Кьил В.А.Васильеваз, республикадин Гьукуматдин Председатель А.А.Здуноваз за жуван ва вири районэгьлийрин патай чухсагъул малумарзава. Районэгьлийриз алукьзавай ЦIийи йис мубаракзава, — лагьана райондин регьберди.
Районэгьлийриз цIийи парк мубаракунин ва алукьзавай 2020-йис тебрикунин хуш келимаяр маса юлдашрини лагьана.
Мярекатдин сергьятра аваз концертни кьиле фена.
И вакъиадикай гегьеншдиз “Лезги газетдин” сайтдай кIелиз жеда.
«Лезги газет»
