Мукьвара Махачкъалада Дагъустандин журналистрин Союздин 60 йис тамам хьуниз талукьарнавай мярекат кьиле фена. Адан сергьятра аваз журналистикадин хиле агалкьунар аваз зегьмет чIугвазвай республикадин са жерге журналистрив шабагьар вахкана. Абурун арада чи халкьдин векиларни ава.
ИкI, “Лезги газетдин” редакцияда хейлин йисара чарарин ва яшайишдин отделдин редактор яз кIвалахай Алаудин Гьамидовав ва “ННТ” каналдин къуллугъчи, сейли публицист Ханжан Къурбановав Урусатдин журналистрин Союздин патай гьуьрметдин грамотаяр вахкана. ДГУ-дин филологиядин факультетдин журналистикадин отделенидин муаллим, машгьур журналист Алик Абдулгьамидов Урусатдин журналистрин Союздин “Пешекарвал. Намус. Лайихлувал” (“Профессионализм. Честь. Достоинство”) медалдиз лайихлу хьана. “Дагъустан” РГВК-дин милли чIаларал акъатзавай вещанидин редактор, “Вахтар ва инсанар” передача кьиле тухузвай Дагъустандин халкьдин артист Исамудин Агьмедован яргъал йисарин зегьмет “Къизилдин лекь” премия гуналди къейдна.
ЦIийи йисан вилик мад са къелемдин устадди — кьетIен хатI авай публицист, “Лезги газетдин” штатдик квачир мухбир Абдулафис Исмаилова кьве конкурсда гъалибвилер къачуна: Дагъустандин информатизациядин, алакъадин ва массовый коммуникацийрин министерстводи коррупциядиз акси месэлайриз талукьарна кьиле тухвай ва республикадин Общественный палатади малумарай “Халкьдин журналист” конкурсра. Къейд ийин хьи, конкурсриз теклифнавай макъалаяр алай йисуз “Лезги газетдин” чинрал акъатнавайбур тир. Кьве конкурсдани Абдулафис Исмаилова 3-чкаяр кьуна ва ам дипломризни пулдин премийриз лайихлу хьана.
Чна чи къелемдин стхайриз агалкьунар рикIин сидкьидай мубаракзава ва алукьнавай 2020-йисуз абурун кьадар мадни пара хьун алхишзава.
«Лезги газет»
