РФ-дин Премьер-министр Дмитрий Медведева Дагъустан Республикада 48 агъзур гектардилай виниз майданар кьазвай “Самурский” милли парк тешкилунин гьакъиндай къарардал къул чIугунва. Талукь тир документ 27-декабрдиз Министррин кабинетдин сайтдиз акъуднава.
“Къул чIугунвай къарардал асаслу яз, Ахцегь, Дербент, Докъузпара ва Мегьарамдхуьруьн районрин мулкарал, тамун фондунин чилерал, санлай къачурла, 48273,15 гектардин майданар кьунвай “Самурский” милли парк тешкилнава. Милли парк Россиядин Минприродадин ихтиярда жеда”, — лугьузва документдихъ гилигнавай справкада. Министррин кабинетдин сайтда къейднавайвал, цIийиз тешкилнавай милли паркунин мулкарик кьве кластер — дуьзенда, гьуьлуьн къерехда авай “Самурдин сив” участок ва кьакьан дагъларин “Шалбуздагъ” участок акатзава.
Милли паркунин дуьзендин паюнин асул-бине заказникдин мулкари — чпик кефердихъай Дербент ва Мегьарамдхуьруьн районрин сергьятрин патарив гвай тамун чкаяр акатзавай мулкарни тешкилда. “Участокди, Самур ва Гуьлгери вацIарин хилери атIана са акьван дерин тушир хейлин кIамар, чухурар арадал гъанвай дуьзендин чка кьунва. Каспий гьуьлуьн кьер тирвал къумадин са жерге кIунтIар хкаж хьанва. И мулкунин набататрин алемдик агъзурдалай виниз жуьрейрин набататар акатзава. Абурун арада лап кьит терг жезвай, Россиядин ва Дагъустан Республикадин Яру ктабра гьатнавай жуьрейрин набататарни ава”, — къейдзава малуматда.
«Лезги газет»
