Мегьарамдхуьруьн райондай машгьур пешекарар — муаллимар, экономистар, багъманчияр, художникар, спортсменар, гьакIни илимдин чIехи кукIушриз хкаж хьанвай ксарни тIимил акъатнавач. Чпин гьакъисагъ зегьметдалди абуру райондин тIвар адалай къецени машгьурна ва и кар давамарзава.
Къе вичикай суьгьбет физвай Гьамидов Лазер Шафтаридиновични ахьтинбурун жергедай я. Ам 1986-йисуз Азадогълида дидедиз хьана. Липецкда 1-классдиз фена. 2004-йисуз хайи хуьре школа акьалтIарна. Гьа и йисуз ам Даггоспедуниверситетдин математикадин факультетдиз гьахьна. Вад йисалай вуз хъсан чирвилер аваз акьалтIарна, информатикадин ва ингилис чIалан муаллимвилин пешекарвал къачуна. Чирвилерихъ къаних жегьилди илимдин рехъ давамарунин, вичин пешедай аспирантурадиз гьахьунин къарар кьабулна. Ада педагогикадин илимрин доктор, профессор Тимур Гьажиевич Визирован регьбервилик кваз “Формирование исследовательских умений будущих бакалавров в условиях информационно-образовательной среды” темадай диссертация кхьиз башламишна. Илимдин кIвалахдин винел зегьмет чIугвазвай вахтунда Лазер Гьамидова вичин темадиз талукь са шумуд цIуд кIвалах чапна. Абурукай 10 — ВАК-ди (Высший аттестационный комиссия) теклифнавай изданийра. Идалайни гъейри, ада Дербентда (2010 ва 2011-йисара) ва Киевда кьиле фейи илимдинни тежрибадин международный конференцийрани иштиракна.
Са тIимил вахт идалай вилик ДГПУ-дин диссертацийрин Советдин заседанидал Лазер Шафтаридиновича диссертация агалкьунралди хвена. Официальный оппонентар тир педагогикадин илимрин доктор, профессор, М.Д.Миллионщикован тIварунихъ галай Грозныйдин нафтIадин гостехуниверситетдин прикладной информациядин технологийрин институтдин директор Эсмира Алисултановади, педагогикадин илимрин кандидат, Дагъустандин гуманитарный институтдин экономикадин ва информациядин технологийрин кафедрадин доцент Шамил Мегьамедова ва анал рахай амай ксари диссертациядихъ практикада авай метлеб екеди тирди, илимдин кIвалахда вилик эцигнавай везифаяр еке устадвилелди кьилиз акъуднавайди къейдна. Диссертациядин Советдин членри рейсадвилелди сесер гуналди Лазер Гьамидоваз педагогикадин илимрин кандидатвилин тIвар гунин къарар кьабулна.
ЦIийи йисан вилик квай йикъара Москвадай чав Лазер Шафтаридиновичан диссертация ВАК-ди тестикьарнава ва адаз педагогикадин илимрин кандидатвилин тIвар ганва лагьай шад хабар агакьна.
Алай вахтунда Л.Гьамидова Махачкъаладин Ленинский райондин администрацияда отделдин начальниквиле зегьмет чIугвазва. Меркездин 34-нумрадин аялрин бахчада тербиячи яз кIвалахзавай уьмуьрдин юлдаш Ирададихъ галаз бахтлу хизанда пуд аялдиз тербия гузва.
Чна жегьил алимдиз агалкьун ва ЦIийи йис мубаракзава. Къуй ам мадни еке дережайрив агакьрай, хизанда хушбахтвал артух хьурай!
Рагнеда Рамалданова
