Алукьнавай йисуз Дагъустандин властриз “Земский учитель” программадин сергьятра аваз республикадин хуьрерин школайра 180 муаллимдиз кIвалахдин чкаяр тешкилдай фикир ава. Идакай Дагъустандин Кьил Владимир Васильева Табасаран райондиз мугьман хьайи вахтунда малумарна.
“2020-йисуз федеральный бюджетдай чаз хуьрерин школайра 130 муаллим кIвалахдалди таъминарун патал пулдин такьатар чара ийида, идал алава яз 50 миллион манат чна региондин бюджетдани фикирда кьунва. Санлай къачурла 180 миллион жезва. Рази хьухь, миллион манат пис пул туш, эгер итимни паб санал фейитIа — им хъсан квартирадин къимет жезва”, — лагьанай а чIавуз В.Васильева.
Адан гафаралди, алай вахтунда Дагъустандин хуьрерин мектебрихъ тахминан 300 муаллимдин игьтияж ава. Гуьгъуьнлай шартIар тешкилиз башламишда. Яд, газ, интернет, ял ядай шартIар авай чкада инсанар, ада гьисабзавайвал, кIвалахдив масакIа эгечIда.
РикIел хкин, 2019-йисан 20-февралдиз Федеральный Собранидиз рекье тур Чарче Россиядин Президент Владимир Путина 2020-йисалай “Земский учитель” программа кардик кутун теклифнай. Ада а чIавуз Россиядин гъвечIи шегьерриз ва хуьрериз кIвалахун патал куьч жедай муаллимриз 1 миллион манат гудайдакай лагьанай.
2019-йисуз Дагъустанда уьлкведа сифте сеферда яз, “Земский учитель” программадин сергьятра аваз 50 муаллим хуьрерин мектебра кIвалахдалди таъминарна. Абурукай гьар сада 1 миллион манат къачуна. Дагъустан и программа кьилиз акъудун патал уьлкведа тежрибадин регион яз хкянавай.
Программадин истемишунрин бинедаллаз, адан иштиракчияр муаллимвилин кIвалахдин тежриба авай, чпин яш 50 йисалай виниз тушир, гьам Дагъустанда, гьамни маса регионра яшамиш жезвай жегьил муаллимар хьун лазим я. Программадин иштиракчияр тир муаллимриз хкянавай райондин мулкунал яшамиш жедай кIвал эцигун ва я маса къачун, гьакIни ам аваданламишун патал ва тайинарнавай мектебда 5 йисалай тIимил тушир вахтунда кIвалахунин шартIуналди 1 миллион манат гузва.
Алатай йисан июлдин вацра РД-дин образованидин ва илимдин министр Уммупазиль Омаровади республикадин Кьили тухвай совещанидал хабар гайивал, 2019-йисан 1-июлдин делилралди, Дагъустандин хуьрерин мектебра 249 муаллим бес жезвачир. Виридалайни гзаф игьтияж ингилис чIалан — 113, математикадин — 40 ва урус чIалан — 27 муаллимрихъ ава.
Къейд ийин, хкянавай школадин патарив гвай чкайра яшамиш жезвай пешекарриз программада иштиракдай ихтияр гузвач. И жигьетдай тайинарнавай кьадардин бинедаллаз, программадин сергьятра аваз кIвалахиз кIанзавай муаллим 200 километридилай мукьва тушир чкадай хьун лазим я.
Амина Муслимова
