Образованидин идарайрин гьалар хъсанарунихъ рекье тунвай Да­гъустан Республикадин “150 школа” проект  уьмуьрдиз  кечирмишун яз, Сулейман-Стальский районда еке кIвалах тухузва. Чпин хсуси пулунин такьатар гуналди, гзаф районэгьлийри баркаллу и кардик еке пай кутазва.

2018-йисуз кардик кутур проектдин сергьятра аваз райондин образованидин 5 идарада ремонтрин кIвалахар тухванай. Проектдихъ цIийивални авай: акъатзавай харжарикай 5 процентдилай тIимил тушиз пулунин такьатар муниципальный тешкилатдин бюджетдай ахъаюн ва умуми къиметдин 15 процент пул меценатрин патай хьун. 2019-йисуз Сулейман-Стальский районди «150 школа» конкурсда иштиракун патал Дагъустан Республикадин экономикадин ва мулкар вилик тухунин министерстводиз 5 арза гана. Абурун бинедаллаз районда умуми образованидин 5 школа ремонт хъувун лазим тир. И школайрин арада Россиядин Игит Радим Халикьован тIва­рунихъ галай Кьулан СтIалрин юкьван мектебни авай. Контрактдин сифтедин къиметди 3095260 манат тешкилзавай. Проектдин документрихъ галаз кьадайвал республикадин бюджетдай 2 миллион манат, чкадин бюджетдай 100 агъзур манат ахъайна, 873038 манат пул меценатри гана.

Кьилди къачуртIа, “150 школа” проект кьилиз акъудуниз кьулан­стIалвияр тир Оруж Оружева 150 агъзур, Арсен Пирмегьамедова, Амир Мегьамедова, Къазихан Азизова, Феликс Мусаева гьарда 100 агъзур, Аким Жаватова 80 агъзур, Ва­гиф Ис­маилова ва Амри Оружева гьарда 50 агъзур, Арсен Абакарова 35 агъзур, Марат Сирхаева 20 агъзур манат, санлай меценатри Кьулан СтIалрин юкьван школада ремонтрин кIвалахриз 885 агъзур манат пул гана. Проектдихъ галаз алакъалу яз меценатри кIватI­навай пул школада ремонтрин кIва­лахар тухуниз бес жезвач.

Герек тир амай пулунин такьатар гунин патахъай Имам Яралиеван мергьяматлувилин “Умуд” фон­­д­унихъ галаз икьрар хьанва.

Чара авур пулунин такьатрихъ тарсар гудай корпусдин къав дегишарунин кIвалахар кьилиз акъудна. Идахъ галаз санал, аукцион тухуналди, пулунин такьатар кьенят авуна. Абурухъ чимивал авай санузелар тадаракламишунин рекьяй алава кIвалахар тухвана.

2019-йисуз Кьулан СтIалрин юкьван школада алай аямдин истемишунриз жаваб гузвай чимивал гудай пичерни эцигна. Алай вахтунда лицензия къачунвай медицинадин кабинет тадаракламишунин кIвалахар тухузва.

Шегьеррин ва хуьрерин школайрин арада авай тафават тIими­ларун патал гъиле кьунвай “Алай аямдин школа” проект уьмуьрдиз кечир­мишунин сергьятра аваз Кьулан СтIал­рин юкьван школада “Точка роста” центр арадал гъун патални кIва­­лахар тухванва. Кьилди къа­чур­тIа, ис­те­мишунрихъ галаз кьадайвал, чпихъ­ 40 квадратный метрдилай ви­низ майдан авай 2 дарамат (класс) чара авунва, анра рак­-да­­кIар къайдадик кутунин ва маса кIвала­хар та­мамарнава, “Технология”, “Ма­те­ма­тика и информатика”, “Основы безо­пасности жизнедеятельности” тарсарай чирвилер гудай кабинетар кардик кутунва, абур герек ви­ри шей­­эралди таъминарнава.

Радим Халикьован тIварунихъ галай школа районда хъсанбурукай сад я. И кIвалах ана кIелзавайбуру райондин, республикадин ва Вирироссиядин олимпиадайра, конкурсра, фестивалра ва спортдин турнирра агалкьунар къазанмишуналди субутзава.

2016-йисуз школади 100 йисан юбилейни къейдна. 2003-йисуз хуьре­ цIийи школа эцигна. Ана 321 аялди кIелзава, чирвилер ва тежриба авай муаллимри кIва­лах­зава.

— Муниципалитетдихъ меценатрихъ галаз кIвалахунин рекьяй районда хъсан тежриба ава, — лугьузва­ Н. Абдулмуталибова. — Ида райондин образованидин идарайрин кIва­лах хъсанаруниз, вилик тухуниз, цIийи­вилер кардик кутуниз екез куьмек гузва. Йисандавай-суз райондин школаяр ремонт авуниз пулунин такьатар гузвай районэгьлийрин, общественный деятелрин, куьмекдин фондарин, карчийрин, карханайрин кьадар артух жезва, гьа идалди абуру образованидин идараяр ремонт авуниз куьмек гунин патахъай республикадин ва райондин руководителрин теклифрин тереф хуьзвайди къалурзава.

И гафарин гьахълувал мад сеферда къалурун яз, чаз районэгьлийрин мердвал, гъилин ачухвал къа­лурзавай са мисал хкиз кIан­за­ва. “150 школа” проектдай шаз ЦIийи поселокдин юкьван школадин къавни дегишарна. Мадни, кьенят авур пулунин такьатрин гьисабдай дакIа­рар кутунин кIвалахар тухузва.

Икьрардин сифтедин къиметди 3 095260 манат тешкилзавай. Идакай 2000000 манат республикадин бюджетдай, 100000 манат муни­ципалитетдин бюджетдай ахъайна, 1 104000 манат пул меценатри — Къуд­рат Айбатова, Нариман Абдулмуталибова, Агъабег Къарибова, Жарулагь Жарулаева, Салаудин Ших­рагьимова ва Имам Яралиеван “Умуд” фондуни гана.

Райондин руководстводи хьиз, ЦIийи поселокдин юкьван школадин дирекцияди, мектебда кIелза­вай аялри ва абурун диде-бубайрини меценатриз куьмек гунай сагърай лугьузва.

Хазран Кьасумов