И йикъара яргъалди чIугур залан азардикди лезги кIелзавайбуруз хъуьруьн ва айгьам квай куьруь эсерралди машгьур хьайи писатель Мегьамед Садикьович Садикьов рагьметдиз фена. М.Садикь — литературадин тахаллус.
М.Садикьов 1953-йисан 11-октябрдиз Хив райондин Цналрин хуьре дидедиз хьана. Хайи хуьруьн школа, ДГУ-дин филфак куьтягьна, хейлин йисара ада “Кард” журналдин редакцияда, Дагъустандин писателрин Союзда жуьреба-жуьре къуллугъар бегьемарна.
Писателдин гъиликай “Арчу ва Цир”, “Ширин гад”, “АцIай варз перишан я”, “Арчудинни Циран аламатар” ктабар хкатна. Абур, куьруь къаравилийрикайни аялар ва яшлубур патал теснифнавай, чпихъ тамам сюжетар ва туькIуьр хьунин кьетIенвилер авай повестрикайни гьикаяйрикай ибарат я. Писателдин хатIуниз, эсерар туькIуьр хьунин кьетIенвилериз чи критикади ва кIелзавайбуруни тайин тир итиж ийизвай.
Хейлин эсерар урус ва маса чIаларизни таржума авунва.
М.Садикь РФ-дин писателрин Союздин член тир. Писателдихъ фикирар, хиялар мадни гзаф авай. Амма залум азарди адаз абур кьилиз акъуддай мумкинвал ганач.
Чна рагьметлудан хизандиз, мукьва-кьилийриз башсагълугъвал гузва.
“Лезги газетдин” редакциядин коллектив
