Дагъустандин мектебра кIелунин йис 25-майдиз акьалтIарун теклифнава. Идакай РД-дин образованидин ва илимдин министерстводин пресс-къуллугъди хабар гузва.
Алай вахтунда уьлкведин хейлин регионра хьиз, Дагъларин уьлкведани тарсар дистанционный къайдада (яни интернетдин куьмекдалди, соцсетрикай ва маса сайтрикай менфят къачуна) тухузва.
Министерстводин пресс-къуллугъди алава хъувурвал, ихьтин къайдадал коронавирус себеб яз элячIна. Дистанционный къайдада тарсар тухузвай чIавуз образованидин идарайри и жуьредин тайинарнавай вири къайдайрал амална кIанзава. Мисал яз, аялриз кьадардилай артух тапшуругъар тагун, технический алатрикай менфят къачунин жегьетдай кардик квай къайдаяр гьисаба кьун, лазимвал аватIа, гьар са аялдив кьилдин къайдада эгечIун ва мсб.
Къейд ийин хьи, тIугъвалдин шартIара кIелунин йис акьалтIарунин график Урусатдин просвещенидин министерстводи теклифнава. Амма кIелунин йис акьалтIардай вахт, эпидемиологиядин жигьетдай авай гьалар фикирда кьуна, регионрин кьилевайбуру тайинарда.
«Лезги газет»
