И йикъара чав туькьуьл хабар агакьна. Дагъустандин агра­рия­дин университетдин хи­пе­хъанвилин, малдарви­лин, гьайванрин продукция акъуддай­ ва гьялдай технологийрин кафед­радин доцент, хуьруьн майишат­дин илимрин кандидат Сади­кьов Муьгьуьдин Мегьамедгьадиевич 72 йисан яшдаваз рагьметдиз фена.

М. Садикьов СтIал Сулейманан райондин Агъа СтIалрин хуьре дидедиз хьана. Юкьван школа куьтягьай гада Дагъус­тандин хуьруьн майишатдин ин­ститутдин зоотехниядин факультетдик экечIна ва ада анаг чешнелудаказ акьалтIарна.

Советрин Армияда къуллугъна хтайдалай кьулухъ ада вичи кIелай институтда кIва­ла­хиз гатIунна. ДатIана чирвилерихъ къаних Садикьова са шумуд сеферда Россиядин (Моск­ва) ва Ставрополдин аграриядин госуниверситетра пешекарвилин дережа хкажна.

Эхиримжи йисара М. Садикьов хипехъанвилин, малдарвилин, гьайванрин продукция акъуд­дай ва гьялдай технологийрин кафедрада хуьруьн майишатдин гьайванрин ва къушарин  генетикадин мумкинвилер артухардай, малдарвилин продукциядин бегьерлувал хкаждай технологияр кардик кутадай месэлайрал машгъул хьана. Ада республикадин малдарвилин хел вилик тухуник вичин зегьметдин пай кутуна. Университетдин коллективда, кафед­радин юлдашрин, студентрин арада ада хъсан чирвилералди, пешедив карчивилелди, гьакъи­сагъвилелди эгечIуналди еке гьуьрмет къазанмишна.

Республика патал зоотехникадай пешекарарни гьазуриз, алимди илимдин 190 макъала­ кхьена, студентар патал методи­кадин 5 учебник акъудна, цIийи технологияр кардик куту­най са патент къачуна. Малдарвилин ерилу продукция акъудуниз талукь цIийивилер кардик­ кутуна. Алимдин, педагог­дин тежриба республикадин хуьруьн­ майишатдин карханайра бегьерлувилелди ишлемишзава.

Муьгьуьдин Мегьамедгьадиевич, тIвар-ван авай алим хьиз, чешнелу хизандин кьил, пуд веледдин буба, къени, хъсан ва рикI ачух дустни тир. Ам чи рикIера яргъалди амукьда. Чна хизандиз ва багърийриз, хажалат чIугунивди, башсагълугъвал гузва.

«ЛГ»