Дагъустан Республикада промышлен­ный производстводин индекс  2026- йисан январь-февраль варцара­ 106,3 процентдиз барабар хьанва. Вилик финин рекье кIвенкIвечияр  энергетика ва гьялдай производствояр я.

Экономикадин кьилин жуьрейрай агалкьунар къалурзавай делилар агъа­дихъ галайвал пай хьанва: гьялдай про­изводствояр – 105,5% (2025-йисуз – 57,7%), электроэнергиядалди, газдалди ва пардалди таъминарун, гьава­ михьи авун – 116,2% (2025-йисуз – 95,1%), целди таъминарун, яд масаниз акъудун, амукьаяр терг авун – 86,1% (2025-йисуз –  72,5%).

Промышленностда агалкьунар хьуни агьалийрин къазанжийризни хъсан патахъай таъсирзава. 2026-йисан январдин делилралди (чӀехи ва юкьван жуьредин карханайриз килигайла), вацран юкьван мажиб 65 456,4 манатдиз барабар хьана. Им 2025-йисан январдин кьадардилай 22,7 процентдин виниз делил я. КIвалахзавайбурун кьадар 26 926 касдив агакьна (алатай йисан январдин рекъемдилай 0,6 процентдин гзаф).

Инал къейд ийин хьи, алатай йисуз республикада промышленный про­из­водстводин индекс 5,3 процентдин­ агъуз­ хьанай. Ихьтин нетижадал гъунин­ себебрикай сад хъвадай, иллаки ич­ки­ квай шейэрин производство тIи­ми­ларун хьана.

Гьа са вахтунда, чна идалай виликни хабар гайивал, Дагъустандин промышленностдин карханайрихъ пешекар кадрийрин еке игьтияж ава. Респуб­ликадин промышленностдин ва алишверишдин министрдин сад лагьай заместитель Гьажимурад Омарова гьисабзавайвал, къе заводриз анжах рабочий гъилер ваъ, жегьил, гьевес авай ва вилик еке макьсадар эцигзавай пешекарар герек я. КIвалахдалди таъминарзавайбуру итиж ийизвай пешекаррин жергеда  токарар, фрезеровщикар, ЧПУ-дин станокрин операторар, слесарар, инженерар – конструкторарни технологар ава.

Пешекаррин виридалайни еке кьит­вал региондин промышленностдин­ чӀе­хи карханайрихъ – «Дагдизель», «Кон­­церн КЭМЗ», «Салаватстекло-Кас­пий»­, «Керамогранит Дагестан» за­водрихъ ава.

Саида Мурадова