И йикъара чав чIулав хабар агакьна: РФ-дин ва РД-дин ла­йихлу муаллим, яргъал йисара Белиж поселокдин образованидин идарайра муаллим ва директор яз кIвалахай Малик Мамедович Алиев чавай гьамишалугъ яз къакъатна.

М.М.Алиев 1950-йисуз До­къуз­пара райондин Филерин хуьре интеллигентдин хизанда дидедиз хьана. 10-класс Дербент райондин Белиж поселокдин 1-нумрадин мектебда лап хъсан къиметралди акьалтIарна. Математикадал рикI алай Малик Мамедовича кIелунар В.И.Ленинан тIварунихъ галай Даггосуни­верситетдин математикадинни физикадин факультетда давамарна. 1973-йисуз М. Алиев, кьилин образование авай пешекар яз, Белиждин 2-нумрадин школадиз кIвалахиз хтана. Пуд йисан къене ада ина, математикадин муаллим яз, акьалтзавай несилриз дерин чирвилерни тербия гана.

Малик Мамедовича зегьмет чIугваз эгечIай сифте йикъалай вич дерин чирвилер авай пешекар яз къалурна. Ам муаллимвилин везифайрив рикIивай, намуслудаказ эгечIна. И кар фикир­да кьуна, райондин руководстводи 1976-йисуз ам Белиждин 3-нумрадин школадин директорвиле тайинарна. 1982-йисуз адаз Белижда ачухнавай 8-нумрадин СПТУ-да директорвиле кIвала­хун теклифна. М.Алиев са шумудра райондин собранидиз депутатвиле хкяна. Ам активный общественникни тир. 2014-йисалай тежрибалу муаллим пенсияда авай.

Яргъал йисара образованидин хиле гьакъисагъвилелди зегьмет чIугунай Малик Мамедович Алиев “РФ-дин лайихлу муаллим”, “РД-дин лайихлу муаллим”, “Халкьдин просвещенидин отличник”, “Россиядин Федерациядин умуми образованидин гьуьрметлу къуллугъчи”, “Зегьметдин ветеран” тIварариз ла­йихлу хьана.

Чна чешнелу муаллим, кар алакьдай тешкилатчи Малик Мамедович рагьметдиз финихъ галаз алакъалу яз адан уьмуьрдин юлдаш Зумрият Зейдулаевна Алиевадиз, веледриз, вири мукьва-кьилийриз башсагълугъвал гузва. Малик муаллимдин экуь къамат чи рикIерай акъатдач.

Мукьва-кьилияр, ярар-дустар, къуни-къуншияр.