Дагълух районра авай куьгьне хуьрер цIийикIа туькIуьр
хъувуни харапIайриз элкъвенвай хуьрерал чан хтуниз таъсирда
30-июлдиз “ЧIехи бубайрин рехъ” лишандик кваз Кьиблепатан Дагъустанда дагъвийрин тарихдиз талукьарнавай чIехи мярекат кьвед лагьай сеферда кьиле фена. Адан сергьятра аваз са десте дагъвияр балкIанрал алаз ва улакьра аваз Кьурагь райондин Гелхенай Агъул райондин РичIа хуьруьз фена. Усугърин, Хвережрин хуьрерай фейи абуру Агъул райондиз агакьдалди 17 километрдин мензил атIана.
Мярекат Агъул райондин ва Кьурагь райондин Гелхенрин хуьруьн администрацийрин куьмекдалди ФЛНКА-дини агъулрин Москвада авай жемиятди тешкилнавай.
Тарихдай малум тирвал, 1239-йисан октябрдин эхирра — ноябрдин эвел кьилера РичIа патал еке ягъунар кьиле фенай. Саки са вацран къене чкадин агьалийри монголрин къуватлу кьушунриз аксивалнай. И вакъиадикай РичIа хуьруьн жуьмя-мискIиндин цла авай къванцел авунвай XI-XII асирриз талукь кхьинри хабар гузва.
Милли парталар алай атлуйрин иштираквал аваз кьиле фейи мярекатди Дагъустандин халкьарин стхавал, дуствал къалурна ва къенин йикъан несилри РичIа патал чанар гайи кьегьалрин экуь къамат рикIел хкана.
ФЛНКА-дин пресс-къуллугъди хабар гайивал, мярекатдин иштиракчияр патал милли парталар лезгийрин ва табасаранрин госдрамтеатрри чара авунвай.
Тешкилатчийрихъ и мярекат гьар йисуз кьиле тухудай ниятар ава. Къейд ийин хьи, ана ашкъи авай гьар са касдивай иштиракиз жеда.
Лагьана кIанда, атлуйри хкянавай рехъ чIехи бубайрин девирда Закавказьедай Дагъустандин кьилин паюниз физвай алишверишдинни дяведин метлеб авай тарихдин рехъ тир. Гьайиф хьи, алай вахтунда дагълух гзаф районра ишлемиш тийиз гадарнавай рекьер пара ава. Абур къайдадик кухтуни харапIайриз элкъвенвай хуьрерал чан хтуниз, экономика, гьа жергедай яз — туризм, вилик финиз таъсирда.
Агьмед Магьмудов
