Алатай саласадиз Дагъустандин жур­налистрин Союздин  председатель яз «Лезги газетдин» кьилин редактор Мегьамед Ибрагьимов хкяна.

Махачкъалада, Р.Гьамзатован тIвару­­­­нихъ галай милли ктабханада,­ кьиле фейи Да­гъустандин журналистрин Союздин (СЖ) председатель хкягъуниз талукьарнавай гьахъ-гьисабдинни сечкийрин конференцияда Дагъустандин Кьилин ва Гьукуматдин Администрациядин руководителдин заместитель, РД-дин кьилин информациядин сиясатдин Управленидин ва пресс-къуллугъдин начальник Рашид Акавова, РД-дин информациядин ва печатдин Агентстводин регьбер Абдуразакь Жамалутдинова, «Дагъустан Этномедиахолдинг» ГБУ-дин руководителдин везифаяр вахтуналди тамамарзавай Арсен Юсупова, республикадин журналистрин Союзди рекье тунвай делегатри (зун аниз 40 касди сесер гуналди хкянавай делегат яз рекье тунвай) ва Россиядин журналистрин Союздин секретарь Ти­мур Шафир кьиле авай Москвадай атанвай делегацияди иштиракна.

Мярекат РД-дин СЖ-дин правле­ни­дин член, РД-дин Кьилин патав гвай Советдин председатель Зикрулла Иль­я­сова ачухна ва кьиле тухвана.

Конференциядин сергьятра аваз, Ти­мур Шафира Россиядин СЖ-дин председатель Владимир Соловьёван тIва­ру­нихъай конференциядин делегатриз Чар кIелна ва Союзди председатель хкягъунин сечкийра Мегьамед Ибрагьимован тереф хуьзвайдакай хабар гана.

Дагъустандин журналистрин Союздин председатель хкягъун патал делегатриз эвел кьиляй кьве кандидатура теклифнавай: «Лезги газетдин» кьилин редактор Мегьамед Ибрагьимован ва ДГУ-дин филологиядин факультетдин журналистикадин отделенидин печатдин СМИ-рин кафедрадин заведующий Гьамид Ме­гьа­медован. Сечкияр кьиле тухуз са шумуд декьикьа амаз,  Гь.Мегьамедова вичи сечкийра иштирак тийидай къарар кьабулнавайди раижна.

Сесер гуз эгечIдалди вилик Рашид Акавова, «Илчи» газетдин виликан кьилин редактор Руслан Башарова, «Дагъус­тандин правда» газетдин кьилин редактор Бурлият Токболатовади ва масабуру Мегьамед Ибрагьимован кIвалахдикай, ада республикадин милли журналистика вилик тухунин карда къалурнавай агалкьунрикай чпин фикирар лагьана ва делегатриз адан кандидатурадин тереф хуьн теклифна.

— Мегьамед Ибрагьимован кандидатурадин тереф за вири патарихъай хуьзва. 2017-йисуз ам конкурсдин бинедаллаз «Лезги газетдин» кьилин редакторвиле тайинарнай. Зун гъалатI хьанач. Ада вич гайи гаф кьилиз акъуддай, кар алакьдай, жавабдар, хъсан къилихрин инсан, регьбер тирди тестикьарна. Къе журналистрин сообществодин вилик чIехи месэла акъвазнава. Чна вирида, массовый информациядин такьатра кIвалахзавай чкадилай, позициядилай аслу тушиз, журналистрин кIватIалдин садвал къалурун лазим я. Мегьамед Ибрагьимов республикадин журналистрин Союздин кьиле хкягъуни, зун кIевелай инанмиш я, хъсан нетижа гуда, — къейдна Бурлият Токболатовади.

Гуьгъуьнлай делегатри ачухдаказ­ ва рейсадвилелди сесер гуналди, М.Иб­ра­гьимов РД-дин журналистрин Союздин председателвиле хкяна.

ЦIийи регьберди кIвалахдин рекьяй юлдашриз вичел ихтибарунай виридаз сагърай лагьана, кIватI хьанвайбур вичин программадихъ галаз танишарна.

Конференция РД-дин СЖ-дин цIийи правленидин ва ревизиядин комиссиядин членар хкягъуналди акьалтIна.

Рагнеда Рамалданова