10-июлдиз Махачкъалада Дагъус­тан­дин Общественный палатадин­ муьжуьд лагьай созывдин заседа­ние кьиле фена. Адан сергьятра аваз тешкилатдин членри цIийи пред­седателни адан пуд заместитель хкяна.

Сесер гунин нетижада председателдин къуллугъ Азизбег Черкесовал ихтибарна. Адан заместителрин везифаяр Шамсият Насрулаевади, Сапарбег Абдуллаева ва Абсалютдин Мурзаева тамамарда.

Къейд ийин хьи, Азизбег­ Улу­биевич Черкесован бине Докъузпара райондин Усугъ­чай хуьряй я. Виликдай ада хейлин йисара РФ-дин ФСКН-дин Дагъустанда авай Управленидин регьбер яз кIвалахна. Ам отставкада авай полициядин генерал-майор я.

*  *  *

Азизбег Черкесов РД-дин Общест­венный палатадин председатель яз хкя­гъуникай вичин фикирар Дагъустандин милли сиясатдин ва динрин крарин рекьяй министерстводин общественный со­ветдин кьил Руслан Гереева лагьана. Адан фикирдалди, А.Черкесов хкягъуни республикада Общественный палатадин роль хкаж хьанвайдан гьакъиндай шагьидвалзава.

«Азизбег Улубиевич Черкесов РФ-дин государстводин ва жемиятдинни сиясатдин деятель, къанун-къайда хуьдай органрин офицер, полициядин генерал-майор я. Адахъ кIвалахдин рекьяй чIехи тежриба ава. Ам Общественный палатадин кьил яз хкягъун – им неинки гьукумдиз авунвай ихтибар, гьакIни аданни Общественный палатадин арада алакъайрин жигьетдай акьалтIай активнивал къалурунин чIехи жавабдарвални я.

Республикада гражданвилин общество туькIуьрунин алат хьиз Общественный палата хьунин игьтияж ава. Амма чкадин гьукумди жуьреба-жуьре этапра и кар алай тешкилатдин мумкинвилерикай икьван чIавалди тамамдиз менфят къачунвачир. Гила гьа кар ийидай вахт алукьнава.

Заз Азизбег Улубиевичахъ чандин сагъвал, кIвалахдин рекье агалкьунар хьана кIанзава», — къейдна Р.Гереева.

Чи  мухбир