РикIел хкин, пуд йис идалай вилик, 2018-йисан 15-майдиз, РД-дин лайихлу муаллим, мергьяматлувилин “Просвещение” фондунин президент Магьмуд Абдулкеримован 85 йисан юбилейдин юкъуз, Ахцегь райондин Хуьруьгрин хуьре Дагъустанда сифте яз просвещенидин “Люминари” (яни экв гудай, илимдин ва пеше хкягъунин рехъ къалурдай) центр ачухнай ва вични Магьмуд Абдулжелиловичан тIварунихъ янай. А чIавалай инихъ, ингье дуьз 3 йис алатайла, чун мад иниз атанва. “Люминари” центр ва адан регьбер хайи йикъан мярекат кар бажармишдай кьетIен къайдада кьиле фена.
И девирда центр вичин вилик эцигнавай мурад-метлебрин гьар са рекьяй хъсандиз вилик фенва, хуьруьн ва райондин аялар патал ина хийирдин пара крар авунва. Центрадин надир тежрибадихъ галаз таниш хьун патал неинки Россиядай, гьакI Германиядай, Австралиядайни кваз пешекарар къвезва…
Мярекатда “Люминари” центрадин коллективдилайни хуьруьнвийрилай алава, кьиле Ахцегь райондин муниципалитетдин регьбер Осман Абдулкеримов аваз, райадминистрациядин ва бязи идарайрин руководителри, школайрин директорри, “Просвещение” фондунин ва вичикай ихтилат физвай проектдин меценат Абдулжелил Магьмудовича ва теклифнавай маса ксари иштиракна.
— “Люминари” центрадин 3 йис — им адан регьбер Магьмуд муаллимдин зегьметдин нетижа, адан кьилиз акъатнавай рикIин хиял, эрзиман мурад я. 88 йис яшар хьанватIани, вун, эбеди двигатель хьиз, садрани акъваззавач, цIийи несилдиз марифат, чирвал гунал амайбурни желбзава ва и кардикай лезет хкудзава. Гележег патал акьалтIай менфятлу и кар патал къуй ваз чандин сагъвал ва яргъи уьмуьр гурай!.., — мярекат ачухунин ва мугьманар тебрикунин гаф рахуналди, центрадин руководитель Дмитрий Корюхина микрофондихъ Магьмуд Абдулжелиловичаз теклифна.
— Чахъ галаз къенин шадвал пайиз атанвай куьн вири сагърай! Уьмуьрлух хуьруьн школада аялриз тербия, чирвал гуз хьайи заз и месэладин важиблувал, метлеблувал хъсандиз чида. Гьавиляй жуван чанда такьат амай кьван за жуван уьмуьр аялар дуьз рекье туниз, абуруз пулсуздаказ девирдин истемишунрив кьур тербиядинни чирвилерин бине эцигуниз бахшзава ва и кардал жуван рухваярни желбнава. Вучиз лагьайтIа, заз чида хьи, алай девирдин вири месэлаяр гьялунин диб просвещение я. Чирвилер къачунин ва гележегдин пеше-кьисмет хкягъунин надир шартIар яратмишнавайвиляй иниз аялар еке гьевес аваз чпин хушуналди къвезва. Адетдин школадилай тафаватлу яз, абур ина чеб чпин ихтиярда ава, муаллимрихъ галаз таяр-туьшерихъ, дустарихъ галаз хьиз гьиссзава. Ина аялриз школадин программада авачир месэлаярни крар чир жезва. Чалай чешне къачуна, гила ЧIарода райондин Тлярош хуьрени гьа ихьтин центрадик кьил кутунва…- къейдна Магьмуд Абдулкеримова.
Тебрикдин гафар “сельсовет Хрюгский” СП-дин кьил Загьидин Сулейманова ва масабуруни лагьана.
“Люминари” центрадин кIвалахдикай кIватI хьанвайбуруз Дмитрий Корюхина суьгьбетна. Чпин чирвилерихъ, кIвалахдин агалкьунрихъ, ачухунрихъни жагъурунрихъ галаз кIватI хьанвайбур мукьувай танишарун патал центрада кардик квай гьар жуьре хилерай мастер-классар, итижлу къугъунарни диспутар тешкилна, тIямлу тIуьнар гана.
— Центрада вири 9 станция-лаборатория ава: Китайдин сирер (чIалан лаборатория, 1-мертеба), чкадин дармандин набататар (башня 3-мертеба), художественная лаборатория (2-мертеба), ктабрин клуб (ктабхана, 1-мертеба), ингилис чIал чирун (гьаят), технологиядин лаборатория (2-мертеба), гейм-дизайн (мугьманар кьабулдай кIвал, 1-мертеба), медиа-студия (2-мертеба), дидед чIал чирун (сакля). Ибурукай гьарда анжах 5 лаборатория хкяна, куьн гьар сад вичин дестедихъ галаз тайинарнавай чкайрал фена кIанда…, — гъавурда туна Санкт-Петербургдай атана, ина кIвалахзавай пешекар-координатор Алиса Козерога.
Къейд ийин, санлай саки кьве сятдин муддатда мярекатдин иштиракчийри чпи хкянавай дисциплинайрай лабораторийра (абур лап хъсандиз тадаракламишнава) вини дережадин пешекаррихъ (Дмитрий Корюхинахъ, Лиля Сатаевадихъ, Павел Маклеровскийдихъ, Раиса Демировадихъ…) галаз кIвалахна.
Мярекат “Люминаридин” кIвалах мадни хъсанардай рекьер веревирдуналди, аялри сегьнеламишнавай “Назад к жизни” тамаша къалуруналди ва мугьманар къунагъламишуналди давам хьана.
Дашдемир Шерифалиев
