И мукьвара Махачкъала шегьердин 42-нумрадин школада хайи чIаларин семинар кьиле фена. Ина вири халкьарин (авар, дарги, лезги, къумукь, лак, табасаран) чIаларалди тухвай тарсари и рекье агалкьунар авайди къалурна. Абурун арадай яз, чи лезги тарсни (ам и цIарарин авторди тухвана) тарифдайди хьана. Чна “Кьуьчхуьр Саид. Уьмуьр ва яратмишунар” тарс тухвана.
Лезги балайри чпин алакьунар устадвилелди гьазурна эцигай гъвечIи сегьнеда къалурна. “Саидаз — жаза” сегьне хандин буйругъдалди жаллатIри гьикI Саидан вилер акъуднайтIа, гьадакай тир.
6-классрин аялри хъсан алакьунар, чпиз дидед чIалал рахаз чизвайди къалурна. Лап халис артистар хьиз къугъвай ашукь Саидан — Гьасанов Къадиран, Сурхай (Мурсал) хандин — Эмиров Эмиран, жаллатIар тир Къагьриманов Саидан, Мусаев Мугьаммадан ва Таибов Мугьаммадан (ам ашукь Саидан дуст тир) ролар иллаки гегьеншбур, тарифдайбур хьана.
Мадни Абасова Исфахана, Рамазанова Аминади, Мамедгьуьсейнова Наидади, Багъиров Эмрана, Имирбегов Саида, Абдурашидова Аминади, Гьажибегова Алинади шаирдин уьмуьрдин рекьикай делилар лагьана ва таъсирдайвал шиирар кIелна.
Инал къейд авун лазим я хьи, чи лезги балайри хайи чIалай дерин чирвилер къачузвайди, абур дидед чIалан тарсуниз ашкъидалди, гуьгьуьллувилелди къвезвайди субут жезва. Абурун арада гьатта шиирар туькIуьрдай бажарагълу аяларни ава. Им шад жедай кар я. Тарсуниз мугьман хьайи шегьердин 50-нумрадин школадин лезги чIаланни литературадин муаллим Роза Алисултановнади виридан патай чаз еке къимет гана. Ада лагьана:
— Заз куьн икьван хъсандиз гьазурунай муаллимдиз сагърай лугьуз кIанзава. Ахпа, балаяр, квез дидед чIалай авай дерин чирвилерай еке чухсагъул! Куьне Кьуьчхуьр Саидан вилер акъудуникай къалурай сегьнеди чаз екез таъсирна, адаз вилел нагъв алачиз килигун гзаф четин я. Куьн сагърай, балаяр, квехъ уьмуьрдин вири хилера еке агалкьунар хьурай! Жуван хайи дидед чIалал гьамиша рикI хьухь, ам чи виридан акьалтI тийир девлет я.
И важиблу мярекат менфятлувилелди кьиле тухун патал чкадин завучар тир, чеб лезги чIалал лап хъсандиз рахазвай Тажибова Эльвира Мегьамедовнади, Загьирова Саяд Демирбеговнади (ам лезги театрдин артист хьайи Абдулкъадир Сайдумован хтул я) чпивай алакьдай куьмекар гана.
Заз кьилди къейд ийиз кIанзава, урус чIаланни литературадин муаллим тир Гьуьсейнова Маисади неинки аялрихъ галаз, гьакIни тарсунин технический кIвалахунар тухуникни еке пай кутуна. Гьавиляй чи тарсни тариф алайди хьана.
Мегьри Абдурашидова,
дидед чIаланни литературадин муаллим
