Россиядин Кьиблепатан сергьятдал алай Мегьарамдхуьруьн районда гьар йисуз уьлкведин Гьавадин десантникрин кьушунрин югъ шад гьалара къейдзава. Лагьана кIанда хьи, “Мегьарамдхуьруьн район” МР-дин кьил Фарид Агьмедовани “лувар квай аскеррин” частара уьтквемвилелди къуллугъна. Адахъ “ВДВ-дин ветеран, гьакъисагъвилелди къуллугъ авунай” орден, “Жуьрэтлувиляй ва намуслувиляй” медаль ава.
Районда десантникрин йикъаз талукьарна тухузвай мярекатдин кьилени Фарид Агьмедов акъвазна. И карда адаз Кьиблепатан Дагъустандин десантникрин союздини шериквална. Къейд авун лазим я хьи, десантникрин юкъуз Мегьарамдхуьруьз неинки Дагъустандай ва гьакI Россиядин жуьреба-жуьре шегьеррайни “лувар квай аскерар” кIватI хьана.
— Чна акьалтзавай несил ватанпересвилин руьгьдаллаз тербияламишун патал гьар са чкада герек шартIар ва гьалар арадал гъун лазим я, — лагьана Фарид Агьмедова. — Гьа са вахтунда чи жаванриз, жегьилриз десантникрин частара къуллугъдай ашкъини гъана кIанда.
КIватI хьанвайбурун вилик хуш рахунар авурдалай гуьгъуьниз, Мегьарамдхуьруьн райондин администрациядин кьили жегьилриз ватанпересвилин тербия гунин кардик аквадай хьтин пай кутазвай къадалай виниз десантникриз гьуьрметдин грамотаяр гана. Абурун арада Москвадай, Махачкъаладай, Дербентдай, Белиждай атанвай ветеранар — десантникарни авай.
— Зун Дагъустандиз ва гьакI Мегьарамдхуьруьн райондиз сад лагьай сеферда атанва, — лагьана Москвадай атанвай десантник Сергей Федотова. — Ина чи кьушунрин югъ къейдзавай тегьер, Ватанди вилик эцигзавай лап муракаб везифаяр кьилиз акъудзавай частарин адетар хуьзвайвал акурла, зун лап шад хьана. Виридаз аферин ва баркалла!
«Лезги газет»
