“Лезги газетдиз” Сулейман-Стальский райондин администрациядин пресс-къуллугъди хабар гайивал, 6-августдиз муниципалитетдиз РД-дин Кьилин ва Гьукуматдин Администрациядин Руководителдин сад лагьай заместитель Нуьсрет Омаров мугьман хьанвай. Ина ам “Сардархуьр-ДаркIуш-Къазмаяр” водопроводдин, Алидхуьрел хкажзавай цIийи мектебдин эцигунрин кIвалахрихъ галаз таниш хьана, инвестицийрин “СтIалрин багълар” майдандиз килигна ва “Мевер” заводдиз фена.
Лагьана кIанда, “Сардархуьр-ДаркIуш-Къазмаяр” водопроводдихъ район экономикадинни яшайишдин жигьетдай вилик тухунин рекьяй еке важиблувал ава. Ада муниципалитетдин 90 процент агьалияр хъвадай хъсан еридин целди таъминарда. Эхиримжи йисара и объектдал са шумуд тадарак кардик кутуна. Алай вахтунда водопроводдин хилер 6 хуьруьв агакьнава. Алай йисуз Эминхуьруьн сергьятривни агакьда. Объект къведай йисуз тамамдиз эцигна акьалтIарун фикирдиз къачунва.
Нуьсрет Омарова къейд авурвал, республикада агьалияр хъвадай целди таъминарунин жигьетдай Сулейман-Стальский районда авай водопровод чIехибурукай сад я. Ада гьакIни объект тайинарнавай вахтунда эцигна акьалтIаруниз кьетIен фикир гун лазим тирди лагьана.
Гуьгъуьнлай Нуьсрет Омаров райондин кьил Нариман Абдулмуталибовахъ ва администрациядин жавабдар къуллугъчийрихъ галаз санал Алидхуьрел эцигзавай мектебдин дараматдиз килигиз фена. Лагьана кIанда, ина авай куьгьне мектеб кьве дараматдикай ибарат тир. Кьведни хаталу (аварийный) гьалда авай. Къейд ийин хьи, ихьтин гьалда авай мектебрин ва аялрин бахчайрин кьадар районда 29-дав агакьзава. Нариман Абдулмуталибова региондин ва федеральный къурулушриз са шумуд сеферда чарар-цIарар кхьейдалай кьулухъ 2018-йисуз Алидхуьрел кIелдай 150 чка авай цIийи мектеб эцигдай къарар кьабулна. Ам алай йисан октябрдин вацра эцигна акьалтIардайвал я.
Вини СтIалрин мулкарал кьилиз акъудзавай “СтIалрин багълар” проектдихъни район патал еке метлеб ава. Н.Абдулмуталибова хабар гайивал, проектдин сергьятра аваз ина логистикадин центр, 50 агъзур тонндив агакьна емишар хуьдай махсус чка эцигдайвал я. Райондин кьили Н.Омаровавай “СтIалрин багълар” проектдиз Дагъустандин кар алай (приоритетный) проектдин дережа гунин месэла республикадин руководстводив агакьарун тIалабна.
Нуьсрет Омаров Сулейман-Стальский райондиз мугьман хьуникай гегьеншдиз “Лезги газетдин” сайтдай кIелиз жеда.
«Лезги газет»
