Дагъустан Республикадин гьукуматдин алакъадин къуллугъди “Лезги газетдин” редакциядиз хабар гайивал, РД-дин Гьукуматдин Председатель Абдулмуслим Абдулмуслимов кьиле авай делегация Луганскдиз фена. Аниз фейибурун арада гьакI РД-дин Кьилин ва Гьукуматдин Администрациядин руководителдин сад лагьай заместитель Махач Омаров, РД-дин военный комиссар Даитбег Мустафаев, рекъемрин жигьетдай вилик финин ва жегьилрин крарин рекьяй министрар — Юрий Гьамзатов, Камил Саидов, хуьруьн майишатдин ва недай суьрсетдин министрдин заместитель Зураб Куччаев авай.
Луганскдин Халкьдин Республикада мугьманвиле авай дагъустанвийри сифте нубатда шегьердин 18-нумрадин юкьван школадал кьил чIугуна. Делегациядин векилар ЛНР-дин Гьукуматдин Председателдин заместитель Анна Тодоровади, образованидин ва илимдин министр Иван Кусова, культурадин, спортдин ва жегьилрин крарин рекьяй министр Дмитрий Сидорова, шегьердин мэрдин заместитель Марина Воротниковади къаршиламишна.
Дагъустан Республикадин Кьил Сергей Меликован тIварунихъай Абдулмуслим Абдулмуслимова школьникриз ва педагогрин коллективдиз алукьзавай ЦIийи йис тебрикна.
Дагъустандин премьер-министрди аялриз алукьзавай йисан гатуз Дагъларин уьлкведа ял ягъиз ва 2023-йисуз республикада къейдзавай Дагъустандин халкьдин шаир Расул Гьамзатован 100 йисан юбилейдин мярекатра иштиракиз атун теклифна.
Ахпа чи республикадин векилар аялрин 129-нумрадин “Березка” бахчадиз фена. Ина тербия къачузвай ва патав гвай школада кIелзавай 300 аялдив ЦIийи йисан пишкешар агакьна. Санлай къачурла, Луганскдин аялриз ширинлухрин 1000 пишкеш гана.
Абдулмуслим Абдулмуслимова аялрин бахчадин коллективдихъ галаз суьгьбетна ва идарадин кIвалах хъсанарун патал Дагъустандивай гьи жуьредин куьмек кIанзаватIа, хабар кьуна.
Дагъустан Республикадин Гьукуматдин Председатель Абдулмуслим Абдулмуслимов Луганскдин Халкьдин Республикадин Председатель Сергей Козловахъ галаз гуьруьшмиш хьана. Кьве республикадин гьукумдин векилрини иштиракай гуьруьшда санал кIвалахунин, сада-садаз куьмек гунин месэлаяр веревирдна.
Дагъустандин векилар тебрик авуналди, Сергей Козлова сифте нубатда ЛНР-дин агьалийриз куьмек гунай ва мугьмандиз атунай дагъустанвийриз сагърай лагьана. Ахпа Луганскдин Халкьдин Республикадин Председателди ЛНР-дин экономика, оборонадин комплекс, къванцин цIивин хкудзавай ва гьялзавай карханаяр авай гьалдикай ихтилатна.
Козлова малумарайвал, Луганскдин Халкьдин Республикадин Кьил Леонид Пасечника региондин гьукумдин вилик везифа эцигнава: уьлкведин маса регионрихъ, гьа гьисабдай яз Дагъустандихъ галазни хуьруьн майишатдин хиляй санал кIвалахунин рекьер жагъурин. Кьилди къачуртIа, абуруз республикада емишар ва майваяр гьасилунин рекьяй амадагвилин алакъаяр мягькемариз кIанзава.
“Луганскдин Халкьдин Республикадин Кьили чи вилик эцигнавай везифайрикай сад багъларихъ галаз алакъалуди я. Чиниз саки вири емишар патарай гъизва. Жуван багълар чаз авач. Гьавиляй ЛНР-дин экономика вилик тухуниз талукь программайрикай сад багълар арадал гъуниз талукьди я. Майвайрикай рахайтIа, абурни чна тIимил гьасилзава. Жуван агьалияр анжах 15-20 процентдин майвайралди таъминарзава. Чаз техил, ракъинин цуькверни бес жезвач. Чна и карда куь тежрибадикай ва куьмекдикай менфят къачун лазим я. Чаз ван хьайивал, Дагъустанди булвилелди прунзни, майваярни гьасилзава. Эгер вилик акъвазнавай месэлаяр гьялун патал санал кIвалахайтIа, чун квелай пара рази яз амукьда”,- лагьана Сергей Козлова.
Вичин нубатдай Абдулмуслим Абдулмуслимова Дагъустан вири жуьредин куьмекар гуз гьазур тирдакай лагьана. Гьа са вахтунда ада санал гьи хилера кIвалахун лазим ятIа, гьадакайни лагьана.
Луганскдин Халкьдин Республикада авайла, Абдулмуслим Абдулмуслимова СВО-да иштиракзавай мотострелковый 136- бригададив ва кьетIен везифайрин “Ахмат” подразделенийрин аскеррив гуманитарный пар агакьарна.
Абурук медикаментар, дарманар, ксудай шешелар, чими ва маса парталар, кIвачин къапар, газдин пичер, термосар, недай суьрсет, якIун 1200 банка консервияр ва гьакI маса шейэрни квай. ГьакIни А.Абдулмуслимова мотострелковый 136-бригададив 14 квадрокоптердин сертификат вугана.
Хийир Эмиров
