РФ-дин Президент В.Путинан Указдалди
Табасаран райондин Ханагрин хуьряй тир Исрафил Мегьамедоваз
кьейидалай кьулухъ Урусатдин Игитдин тIвар гана
Ислен юкъуз Дагъустандин Кьил Сергей Меликовани уьлкведин Кеферпатан флотдиз регьбервал гузвай адмирал Александр Моисеева Украинада кьиле физвай махсус серенжемда кьегьалвилелди телеф хьайи капитан Исрафил Мегьамедован хизандив Урусатдин Игитдин Къизилдин Гъед вахкана. Республикадин Кьилин пресс-къуллугъди хабар гузвайвал, жегьил капитанди серенжемда мотострелковый бригададин батареядиз регьбервал гузвай.
“Вичин уьмуьрдин эхиримжи легьзедалди Исрафил Мегьамедова женгинин рекьяй вичел ихтибарнавай везифа тамамарна… Адан кьегьалвал, са шакни алачиз, чпин гележегдин пеше хкягъунин къайгъуйрик квай вири аскерарни жегьилар патал чешне я…”, — къейдна, шабагь вахкудайла, А.Моисеева.
Сергей Меликован гафаралди, Мегьамедова къалурай игитвилел вири Дагъустанди дамахзава. “Исрафил Мегьамедовани алай вахтунда серенжемда иштиракзавай амай гадайри къалурзавай кьегьалвилери тербиядихъ гьихьтин важиблувал аватIа къалурзава. Гьар са касдин бейнида гъвечIи чIавалай ватанпересвилин, кIевевайдаз куьмек гунин, Ватан хуьнин гьиссерал чан гъунихъ еке метлеб ава…”, — лагьана Дагъустандин Кьили.
Исрафил Мегьамедован бине Табасаран райондин Ханагрин хуьряй я. Адан хизан Дагъустандин Огни шегьерда яшамиш жезва. Капитанди алай йисан 23-майдилай Украинада кьиле физвай махсус серенжемда иштиракзавай ва Кеферпатан флотдин мотосрелковый бригададин батареядин командирдин везифаяр тамамарзавай.
1-15-октябрдиз ада регьбервал гузвай батареяди Херсондин областдин Шевченовка, Украинка, Новая Каменка хуьрерин патарив кьиле фейи женгера иштиракна. Исрафил Мегьамедова вичел ихтибарнавай везифаяр намуслувилелди кьилиз акъудунин нетижада Украинадин яракьлу къуватрин бронетехникадин 40 уьлчме тергна. 15-октябрдиз Новая Каменка хуьруьн патарив нацистрин гьужумдин вилик пад кьазвай женгина душманди Урусатдин Яракьлу Къуватрин танкариз акси ракетайрин къурулуш тупунай яна. Нетижада хьайи хирерик Исрафил Мегьамедов телеф хьана. РФ-дин Президент Владимир Путинан Указдалди адаз кьейидалай кьулухъ Урусатдин Игитдин тIвар гана.
Къейд ийин хьи, Исрафил Мегьамедов Украинада кьиле физвай махсус серенжемда къалурай кьегьалвилерай Урусатдин Игитдин тIварцIиз лайихлу хьайи вад лагьай дагъустанви я. РикIел хкин, идалай вилик уьлкведин виридалайни кьилин шабагьдиз старший лейтенант Нурмегьамед Гьажимегьамедов (яхулви), генерал-майор Эседулла Абачев, старший лейтенант Руслан Къурбанов (кьведни табасаранвияр) ва майор Энвер Набиев (лезги) лайихлу хьана.
Агьмед Магьмудов
