СтIал Сулейманан тIварунихъ галай Лезгийрин госмуздрамтеатрдин артистар Кьурагь райондиз мугьман хьана. Абур “Инсандин капитал” кар алай проект уьмуьрдиз кечирмишун патал Дагъустан Республикадин культурадин минис­терстводи кардик кутунвай “Яратмишунрин десант” проектдин сергьятра аваз атанвайбур тир.

Кон­церт театрдин кьилин режиссер Мирзабег Мирзабегова театр­ди эхиримжи вахтунда тухузвай кIвалахдикай куьруь суьгьбету­налди ачухна. Ихьтин концерт гваз абур лезги ви­ри районриз мугь­ман жезва. Концертда РД-дин халкьдин артистка Фаризат Зейналова­ди, РД-дин лайихлу артист  Руслан Пирвердиева,  Эль­ми­ра Къара­хановади, ФатIима Фейзуллаевади районэгьлийриз чпин ширин­ сесералди манияр тамамарна. Мярекатдин сергьятра аваз Алирза Саи­дован шиирарни кIелна. Артиствилин бажарагъ ачухарзавай кьурагьви, театрдин жегьил артистка Фа­тIима Фейзул­лае­ва­ди везинлуда­каз кIелай “Саидан вилер” шиир вирибуруз бегенмиш­ хьана. Шиирар  мад Эминат  Заирбековади,  концерт кьиле­ тухвай Назира Агъасиевади ва масабуру кIел­на. Кьурагьрин та­рихдикай, райондай акъатай, культурадин рекье чпин тIвар машгьур авур ксарикай шаир, публицист  Азиз  Мирзабегова  суьгьбетна­.

Чеб хушдаказ, кьурагьвийриз хас къайдада кьабулунай театрдин векилри райондин  руководстводиз, культурадин, информациядинни печатдин Центрадин начальник Абдукъадир Будаеваз сагърай лагьана, мукьвара тамаша эцигун патал мад райондиз къведайди  къейдна.

Россиядин халкьарин адетрин культурадин Центрадин директор Кевсер Фейзуллаевади райондин администрациядин па­тай атанвай мугьманриз чухсагъул лагьана.

Дагъви Шериф