Чаз чизвайвал, гьар са газетдин асул везифа инсанрал итижлу ва менфятлу малуматар агакьарун, жезвай цIийивилер халкьдин арада фад-фад чукIурун я. И асул везифадилай алава яз, Дагъустанда хайи чIаларал чапдай акъатзавай гьар са газетди а халкьдин меденият, хайи чIал хуьнин жигьетдай еке кIвалах тухузва. Милли чIалал газет акъатзаваз хьун вич а чIалан дережа хкажунин, меденият еримлу авунин институт кардик ква лагьай чIал я.
17-июндиз Дербентда “Лезги газетдин” редакцияди тешкилай Лезги прессадин сад лагьай фестивалдин макьсадни милли прессадин гьалар раижун тир.
Къенин аям интернетдинди ятIани, басмадин такьатрин къуват зайифни хьанвач, я интернетдивай абур эвезизни жедач. Мисал яз, “Лезги газетда” жезвай вири макъалаяр, малуматар интернетдай виликамаз жагъизва лугьун таб ихтилат я. Эхь, газетдиз акъатайдалай кьулухъ макъалаяр махсус сайтдани чапзава. И кардихъни еке метлеб ава — дуьньядин гьар са пипIе авай лезгийривай жуван чIалал макъалаяр кIелиз жезва.
Инал заз мад са кардикай ихтилат ийиз кIанзава хьи, фестиваль жедалди вилик чна соцсетрин куьмекдалди газет кIелзавайбуруз гзафни-гзаф гьихьтин макъалаяр хуш ятIа чирунин серенжем кьиле тухвана. Кьвед-пуд йикъан къене чпин фикирар малумарай ксарин кьадар гзаф туширтIани, нетижада чир хьайивал, гзафбуруз хайи чIалакай, тарихдикай, медениятдикай кхьенвай макъалаяр бегенмиш я. Тажуб жедай делил туш, сайтдани инсанри гзафни-гзаф чIалакайни тарихдикай кхьенвай макъалайриз итиж ийизва. Яни им чи халкьдин арада чIалан, газетдин игьтияж артух тирдан гьакъиндай шагьидвалзавай делил я…
ТIугъвалдин девирда кьиле тухвай сад лагьай фестивалдикай лагьайтIа, ана иштиракайбуру ихьтин мярекатар мукьвал-мукьвал тухун герек яз гьисабзава.
Фестивалда Докъузпара районди иштирак тавунин делилди тажубарай хейлинбуру, ам гьикI хьайи кар я лагьана, чавай хабарар кьазва. Са кар фадлай малум я хьи, масанрив гекъигайла, и райондин сергьятра милли медениятдиз, хайи чIалаз талукь мярекатар саки кьиле физвач. Маса “важиблу” месэлаяр гьялунин гъиляй мажал авач жеди. Эхиримжи вахтара Докъузпарада халкьдихъ авай республикадин газет кхьизвайбурун кьадарни тIимил хьанва. Бес акьалтзавай несилриз ватанпересвилин, халкьпересвилин чешнеяр къалурунин, абурун арада халкьдин милли меденият, хайи чIал таблигъ авунин месэлаяр саймиш тийидайбурукай яз гьисабзавани? Чна умуд кутазвайвал, ихьтин месэлаяр гила райондин кьиле акъвазнавай жегьил регьберди важиблубурун жергедик кухтада.
К.Ферзалиев
