Малум тирвал, алай вахтунда СтIал Сулейманан райондай цIудралди кьегьалри Украинада кьиле физвай махсус серенжемда иштиракзава, жуьрэтлувилер къалурзава. Абурукай сад даркIушви Асваров Славик я. 1999-йисуз хуьруьн юкьван школа акьалтIарай адаз армиядин жергейриз эвер гана. 2010-йисалай С.Асварова контрактдалди Чечняда къуллугъиз башламишна. Алай вахтунда ада Украинада РФ-дин Яракьлу Къуватри кьиле тухузвай махсус серенжемда иштиракзава. И йикъара РФ-дин милли гвардиядин Кеферпатан Кавказдин округдин кьушунрин частунин командир подполковник И.В.Скляра кьегьал хцин диде-бубадиз Чухсагъулдин чар рахкурна. Кьилди къачуртIа, чарче кхьенва:

“Гьуьрметлу Играмудин Асварович ва Нажабат Сефербеговна! ЧIехи гьуьрметдивди Квез чар кхьизвайди Куь хва Славика къуллугъзавай частунин командир я. Куь хци вичин буржи намуслудаказ кьилиз акъуд­зава. Адаз яракь устаддаказ ишлемишиз чизва, кичIевал, жуьрэтсузвал чидач. Донецкдин Халкьдин Республикадин ва Луганскдин Халкьдин Республикадин ислягь халкьар хуьн патал тухузвай махсус­ серенжемда викIегьвал, пешекарвал къалурзава.

Подразделенидин начальникдин, частунин командованидин ва кьилди жуван патай викIегь ватанперес хва тербияламишунай Квез чухсагъул! Куьне халис итим, Ватан хуьдай кьегьал тербияламишна. Чна Куь хцел дамахзава!”

Чаз алава хъийиз кIанзава хьи, кьегьал гьар са хцел неинки диде-бубади, гьакIни райондин вири агьалийри дамахзава.

Хазран Кьасумов