Виридуьньядин халкьарин хайи чIаларин йикъан сергьятра аваз “Лезги газетдин” редакцияди, 2018-йисалай гатIунна, гьар йисуз хайи чIалайни эдебиятдай мектебра кIелзавай аялрин арада олимпиада кьиле тухузва.
Жегьилрин арада хайи чIал машгьурунин, ам вилик тухунин макьсаддалди цIи ругуд лагьай сеферда тешкилзавай олимпиада 18-февралдин сятдин 10-даз Каспийск шегьердин РЦО-да (Республикадин образованидин центр) Махачкъала ва Каспийск шегьеррин мектебрин 6-классра кIелзавай аялрин арада кьиле фида. Алатай йисара хьиз, цIини тафаватлу хьайибуруз (1, 2, 3-чкаяр кьурбуруз) дипломар, пулунин пишкешар ва ктабар гуда.
Аялри орфографиядизни пунктуациядиз талукь тест-диктант, лезги чIалайни эдебиятдай тестер ва маса тапшуругъар тамамарда. КIвалахриз баллрин куьмекдалди къимет гуда.
КьетIендаказ къейд ийин хьи, олимпиадада гьар мектебдай анжах са аялди иштиракун шартI я. Олимпиададин патахъай суалар хьайитIа, телефондин 8-928-584-16-72 нумрадиз зенг ийиз жеда.
«ЛГ»
